GITAKTAK sa Association of Barangay Council (ABC) Cebu City Chapter ang ilang liaison officer nga si Roger Cimafranca nga usa ka radio blocktimer.

Gisuspenso usab ang iyang duha ka mga kauban og usa ka buwan nga way sweldo.

Ang silot gipahamtang sa ABC human niya gikalalis ang traffic enforcer may labot sa lagda sa trapiko niadtong Mayo 20 sa South Road Properties.

Si Cimafranca nakuhaan og video nga gi-post sa Facebook nga aroganteng nanghulga sa enforcer human sila dakpa tungod sa overloading ug wa pagsul-ob sa duha og helmet.

Sila si Barangay Kapitan Joel Garganera sa Tinago, kinsa bise presidente sa ABC ug chairman sa three-man investigating body, Kapitan Joel Bacor sa Binaliw ug Kapitan Ramil Ayuman sa Apas nga pulos mga sakop sa ABC board maoy ningrekomendar sa maong silot.

Matod ni Garganera nga way rason sila ni Cimafranca ug kaubanan nga mag-overloading ug moingon nga walay kasakyan sanglit ang ABC nihatag og tag -1,000 nga transportation allowance matag buwan nila ni Cimafranca, ABC bookkeeper Alvin Enanoria ug ABC clerk Phillip RJ Cardona.

Ang gibuhat ni Cimafranca nagpakita sa iyang pagpangabuso kon di niya makuha ang iyang gusto, matod sa mga kapitan.

“Such attitude should not be tolerated otherwise the public will be placed in hostage situations by employees who will threaten to file complaints whenever they do not get their way with their whims,” matod nila sa ilang report.

Si Cimafranca, kanhi radio blocktimer, nakontrobersiya human gipara ang iyang motorsiklo ni Traffic Enforcer Lyndon Ocampo kay overloading ug ang duha ka angkas wa nagsul-ob og helmet, ug nangasaba sa traffic enforcer kay nganong gidakop siya.

Si Ocampo three-time employee awardee sa City Hall sa iyang 17 ka tuig nga pagserbisyo.

Si Cimafranca niingon nga andam niyang dawaton ang desisyon sa ABC ug mobalik siya sa iyang pribadong panginabuhi.