GIBAYAW sa kapunaw-punawan sanglit malamposon sa patigayon. Apan gialig-ig sa dihang nakasugat og kalbaryo. Hinoon wala matarog sa daghang mga pagsulay sanglit dunay ikasarang. Sa inbestigasyon sa 2001 nahugno si Rep. Tony Cuenco sa House Committee on Dangerous Drugs ngadto sa DOJ, NBI ug PNP nga napakyas sa pagkuha og dugang mga ebidensya aron pagpalutaw sa kamatuoran kinsa gyod nga Peter Lim. Adunay Peter Co Lim, Peter Lim alyas Jaguar ug Bary Lou alyas Peter Lim.
Sa House Inquiry sa 2001 sila si Ananias Dy ug Bernard Lui nga kanhi empliyado ni Peter Lim sa Hilton Industries mibutyag nga si Lim nagpadala og ilegal nga drugas sa nagkalain-laing dapit sa nasod. Napukaw ang maong pasangil sa dihang gibutyag ni Pres. Rodrigo Duterte nga si Peter Lim nalakip gihapon sa negosyante nga gilambigit sa drugas. Sa unang semana sa Marso 2017 ang igsuon ni Peter Lim nga si David Lim Sr. nakabangga sa nagmotor nga tinderog isda ug namatay. Walay kaso nga napasaka kay naareglo ra. Dinhi nahinomdoman kadtong pag-utingkay sa rice smuggling nga usa sa mitumaw ang ngalan ni David Lim.
Sa tungatunga sa Marso 2017 nauyog na sab ang pamilyang Lim sa dihang si David Lim Jr. nakapusil sa nurse Ephraim Nuñal gumikan sa road rage o away sa trapiko. Nabilanggo apan ubos sa special treatment. Daling nakapiyansa ug nakatagamtam gilayon sa temporaryong kagawasan. Karon kay nahilom gihatod ngadto sa hingpit nga pagka-gawasnon. Nalangay ra ba ang preliminary investigation sa kaso. Diha toy lakang nga mobakasyon si Lim Jr. sa laing nasod, ambot og napugngan ba sa mga abogado ni Nuñal. Samtang si Nuñal nakagawas na sa ospital sa miaging Mayo 29 apan padayon pa ang therapy.
Rice smuggling. Daghang nangutana asa naman kutob kadtong pag-ukay sa rice smuggling sa 2015 diin upat ka mga ahensya sa gobyerno ang nagsiksik sa mga anino sa palusot sa liboan ka mga sinakong bugas humay gikan sa Vietnam, Thailand ug Malaysia. Gitabangan kadto pagsusi ug pag-utingkay sa NBI, DOJ, DA ug BOC. Mitumaw gani ang mga ngalan nila ni Davidson Bangayan alyas David Tan nga maoy giilang hari sa rice smuggling, David Lim, Danny Ngo, Danilo Garcia, Willy Sy lakip ang mga consignees ug brokers. Niining ulahi gisakmit sa BOC ang 3,000 ka toneladang bugas balor og 200M nga gidunggo sa baybayon sa Talisay karga sa barkong Vietnamese MV Kung Min. Asa pod kaha punta ang mga inimbargo? Maayo untag ipakatap sa merkado ubos sa barato nga presyo. Apan namatikldan nga mahal ang bugas humay. Gamayon lag kaon sa humay kay maka-diabetic kon daghanon, matod pa ni Sen. Cynthia Villar. Dangop lang ta sa mais nga maoy naandang kalan-on natong mga Bisaya. Nahinomdom ko kaniadto nga mamalit mig puso kay iparis sa linung-ag mais nga bahogan og sardinas nga pinalit sa lungsod gilkan sa halin sa gibaligyang manok. Samot na kon iparis sa linarang bakasi. csa_1156@yahoo.com/0916-734-5737