USA ka maestro nga niangkas sa motorsiklo sa iyang anak paingon sa tung­haan sa lungsod sa Com­postela gipusil-patay sa duha ka tawo nga nag-mo­tor sa Highway Pitogo, lungsod sa Consolacion a­las 8 kagahapon sa buntag.

Patay diha-diha si Felimon T. Nepumoceno, 44, minyo, taga Pulpogan 3, Consolacion.

Matod ni PO1 Micheal Villardar sa Consolacion Police Station nga atol sa hitabo giingong gisundan nang daan sa duha ka mga killer si Nepumoceno nga nag-angkas sa iyang anak.

Saysay ni Villardar nga pag- abot ni Nepumoceno sa Pitogo, kalit lang nipabuto gamit ang kalibre 45 nga armas ang angkas sa nagsunod kanila nga motorsiklo.

Patay si Nepumoceno sa dihang nakaangkon og samad pinusilan sa iyang ulo.

Matod ni Villardar nga lima ka mga kabhang ug usa ka slug sa .45 kalibre nga armas ang nakit-an sa crime scene.

Dugang niya nga gi-target sa mga killer ang ulo ni Nepumoceno.

Duha ka mga slug ang ning-ungot pa sa helmet sa maestro.

Dali nga gitabang ug gidala sa Vicente Sotto Memorial Medical Center si Nepumoceno apan patay na kining niabot didto.

Gisusi sa kapulisan ang motibo sa pagpamusil ug matod ni Villardar nga mas gipalawman pa nila ang ilang imbestigasyon tungod kay sigun pa sa mga igsuon ni Nepumoceno nga wa man kini kaaway.

Sa laing bahin, patay ang usa ka lalake human namusil sa kapulisan sa dihang gi-serve unta ang arrest warrant sa kasong murder sa Riverside Poblacion, Consolacion alas 6 kagahapon sa buntag.

Asoy ni Villardar nga mipabuto si Vincent C. Vibar, hingkod, lumad nga taga Maasin, Leyte sa iyang kalibre .45 nga armas sa dihang miadto sila sa iyang gipuy-an.

Usa ka sakop sa Special Weapons and Tactics (Swat) ang naigo sa kamot.

Si Vibar namatay diha-diha tungod sa nga sa kalawasan.