BISAN og kuwang og igong security personnel, gipasalig sa kadagkuan sa Cebu Ports Authority nga higpit ang seguridad ug usa ang mga pantalan sa Sugbo nga labing luwas batok sa mga teroristang grupo.
Si Port Management Department Manager Oscar Lopez niingon nga gumikan sa koordinasyon sa nagkadaiyang mga ahensiya sa gobiyerno nga tigpatuman og seguridad, higpit nga gibantayan ang mga pantalan sa Sugbo aron di malutsan sa dautang mga elemento nga motisok og kasamok.
Pinaagi sa Department Order No. 2017-008 ni Transportation Secretary Arthur Tugade nga giisyu niadtong Hunyo 5, 2017, ang Philippine Coast Guard ang gitahasan nga chief security coordinator o maoy mangu sa seguridad sa tanang mga pantalanan sa nasod, sukad gipatuman ang Martial Law didto sa Mindanao.
Si Maritime Industry Authority 7 Regional Director Jose Venancio Vero, Jr., niingon ang department order magpabilin hangtod magpabilin ang Martial Law sa Mindanao.
Dinhi sa Sugbo, matod ni Ensign John Michael Alip, deputy commander sa Coast Guard Cebu Station, wa pa sila maka-takeover sa seguridad sa mga pantalan.