DIHA ra duol sa balay niagi ang nagmotorsiklo nga batan-on dihang nabitik sa nagbitay nga alambre sa miaging semana. Moingon sila nga aksidente ang nahitabo. Duna say moingon nga iya kining signos.
Apan dakong pangutana sa mga kasilinganan nganong gipasagdan man nga nagbitay ang alambre diha sa dalan? Nganong wala man kini atemana dayon samtang wa pay nahitabong aksidente?
Laing pangutana sa pipila, nganong gitugtan man nga moagi ang mga dagkong trak ug mga container van sa dalan Uldog nga hagip-ot ug masangit sa ubos kaayo nga mga alambre?
Gawas pa niini, hinungdan ang maong dagkong mga trak sa trapik kon magdungan na kini sa pag-abot ug maghuot.
Dugang pa, kining mga dagkong trak ang hinungdan nga naguba ang mga gagmayng dalan sa Carmen Village.
Kay ngano man sab nga gitugtan man ang mga dagkong mga bodega duol sa mga kabalayan? Kay nganong wa may klarong zoning plan ang Syudad sa Talisay?
Ambot kanus-a motan-aw sa maong kahimtang ang mga kadagkuan sa Syudad sa Talisay? Unsa man Mayor Eddie Gullas?
Fake news
Giduso karon kining Senate Bill 1492 nga nagsugyot nga ipapriso og lima ka tuig ug pahamtangan og P5 milyones nga multa ang mopublikar og fake news.
Nindot ang tumong sa maong balaod kay ang pagkuyanap sa fake news karon nakadaot na sa atong demokrasya. Nasigurado akong daghan ang mouyon sa maong balaodnon. Apan ako, gusto unang motan-aw sa mga detalye sa balaod kay basin moresulta hinuon kini sa paglugpit sa atong kagawasan sa pagpamahayag.
Kinahanglang matino kon ang usa ka balita nga giingong peke, peke ba gyud.
Nakabantay mo nga bisan gani ang mga nagsigig publikar niining mga di katuohang balita mao sab ang moreklamo nga fake news ang balitang makadaot sa ilang mga prinsipal?
Gani, hasta ang mga lehitimong mga mantalaan nganlan na hinuon karon nga fake news. Ang resulta, nisamot ka lubog ang kahimtang.
Apan kinahanglan nga klaro sab unsay atong paagi sa pagtino kon tinod ba o dili ang usa ka ka giingong balita.
Dako sab nga konsiderasyon nga kining balaodnon di mahimong kahimanan nga malutos na hinuon ang tanan ug mayatakan ang katungod alang sa kagawasan sa pagpamahayag.
Sa pagkakaron, klaro man nga kining pagkuyanap sa mga fake news dunay kalambigitan sa politika ug lain-laing mga kampo ang tinubdan niini. Ang pagbatok sa fake news moguwa sab nga mapahiran sab og politika.
Kinahanglan nga ang modesisyon kon ang usa ka balita peke o dili lang bisan kinsa, apan usa ka sinaligan nga huwes nga nasuweto sa paagi sa pagtino kon unsay tinuod o dili.
Tungod niini, kinahanglang maklaro nato unsay detalye sa maong balaodnon.
(@anol_cebu sa Twitter)