MIBIRA na sab og dugang nga bronze nga medalya ang 6-anyos nga Kagayanon nga si Ruelle Canino sa bago lang nahuman nga 2015 ASEAN Age Group Chess Championships didto sa Singapore.
Duha na ka bronze nga medalya ang iyang naangkon tanan diin ang usa nakuha niya sa rapid event samtang nasundan dayon kini sa ikaduha human kini nilanding sa ikatulo nga pwesto sa 8-under girls blitz event.
Garbo sa San Nicolas, Barangay Kauswagan, nitala si Canino og unom ka puntos human niya napilde ang Vietnamese nga si Luu Que Chi sa kataposang round sa 9-round Swiss System nga blitz event. Naharos gihapon sa Vietnam ang bulawang medalya ug silver sa U8 girls blitz nga sila Thai Ngoc Tuong Minh ug Nguyen Hoang Thai Ngoc, sunodsunod.
Iyang 12-anyos nga magulang nga si Ronald wala nakabingwit og medalya sa tulo nga event sa standard, rapid ug blitz nga mga event sa 12-under open.
Si Mary Joy Tan, taga Jasaan, Misamis Oriental, hapit pa nakasulod sa top three apan igo lang nakatongtong sa ikapito nga pwesto nga adunay unom ka puntos sa under-12 girls.