NAPANAS sa Golden State Warriors ang ilang 40 ka tuig nga paghulat nga madugangan na sab og titulo human nila natapos ang Cleveland Cavaliers, 105-97, sa Game 6 sa ilang best-of-seven NBA Finals kagahapon.
Kontrolado sa Warriors ang dula hilabi na nga napugnan nila ang rally sa Cavaliers sa kataposang duha ka minutos nabilin sa dula aron angkonon ang ilang ikaduha nga titulo sa kasaysayan sa NBA.
Mibira si league MVP Stephen Curry og 25 puntos, walo ka assist ug lima ka rebounds alang sa Warriors samtang nakigtimbayayong si Andrei Iguodala susama nga puntos ug nikuha pa og lima ka assist ug lima sab ka rebounds.
Midikit ang Cavaliers sa unom nalang ka puntos nga biya, 100-94, sa himatyanon nga segundos na nabilin apan nakakuha sila Curry ug Iguodala og mga fouls diin nakatabang kini og babag ug masilyo ang kadaogan.
Gikan sa higpit nga una nga half nga nahuman sa 45-43 nga labaw sa Warriors, didto sila nakabwelo sa ikaduha nga half diin nibinat sila og kinataas nga labaw nga 15 puntos.
Si LeBron James nikulit og 32 puntos, 18 rebounds ug siyam ka assist sa Cavaliers apan niangkon siya og lima ka turnover.
Halos kang James ang gipamugna og play sa dula nga wala kaayo kaabag nga motimbayayong diin duha sa ilang all-star starters nga sila si Kevin Love ug Kyrie Irving ang nainjured gikan pagsulod nila sa playoffs.
Sa iyang pagpaningkamot sa opensiba ug depensa kang James, nanganlan nga Finals MVP si Iguodala human sa dula.