KANIADTO igo lang mopatim-aw ang mga barkong' panagatan sa China sa atong kadagatan. Unya nagsige sila og panagat dayon nagtukod og mga gagmayng' gambalay nga kapasilongan.
Karon, duna na silay mga Navy boat nga nagpatrolya sa South China Sea nga kabahin pa gihapon sa teritoryo sa Pilipinas.
Ning bag-o, naghimo na gayud sila og tugpahanan sa eroplano ug nagtukod mga dagkong gambalay sa ilang gimugna nga reclamation sa may Spratly Islands nga tipik gihapon sa dapit nga giangkon sa Pilipinas.
Kaniadto, ang gobiyerno sa Pilipinas igo lang mopadala og sundalo nga mobantay sa gikasungian nga kadagatan.
Unya, kanunay hasion ang atong mga sundalo, ug apil na gani atong mga mangingisda sa mga Intsik nga nag-operate usab sa maong dapit.
Nagpulipuli na ang presidenti sa Pilipinas ug nagpabilin gihapon ang suliran apan nagkadako na ang teritoryo nga giangkon sa China.
Tinuod, walay dag-anan atong nasod kon mosukol ta sa higanting China. Mao man gani nga gipaagi sa atong gobiyerno sa kaso ngadto sa United Nation.
Kining hitsura sa problema sa gikasungian nga kadagatan sa Pilipinas nagpakita kini sa tinuod nga taras sa atong gobiyerno ngadto sa iyang katawhan.
Nagpasabot nga dili sinsero ang gobiyerno nga namalipod sa iyang katawhan.
Ang kakuwang og himan sa military diha sa kadagatan ug kahanginan dili maoy rason nganong dili mapugngan sa Pilipinas ang tinonto aning China.
Kay hangtod karon, mogamay man o modako ang atong nasudnong budget, dili ta makakita og konkretong aksiyon sa gobiyerno batok sa China.
Dunay mga pribadong grupo sama sa US Pinoys for Good Governance ang nahimo og aksiyon batok sa China sud nga sa dugayng katuigan.
Ilang gipanawagan ang pag-boykot sa mga produkto nga gihimo sa mga Intsik.
Maayo ang maong tinguha apan dako usab kini og epekto sa atong ekonomiya.
Busa, unsa may solusiyon aning tanan nga daw wala man gayud makahiusa ang Pilipinas – mga opisyal sa gobiyerno, business sector ug ang yanong mga molupyo.
Kon higanti atong kaaway mas maayo tingali mosandig pud ta og higanti nga kaabag o makighiusa ta sa ubang gagmayng' kasosyo aron matupngan nato o malabwan ang kusog sa kaaway.
Panahon na kaha nga ibalik nato ang nasiak nga relasiyon uban sa Estados Unidos, labi na kabahin sa paghatag og seguridad sa atong nasod?