HABWA ang tina-e sa usa ka ulitawo human giluba sa kainom niadtong Martes mga alas 7:00 sa gabii sa Barangay Kilablab, Sta. Ana, Tagoloan, Misamis Oriental.

Nawad-an sa panimuot nga nadala sa tambalanan ang biktima nga si Bernie Yagma, lumulupyo sa Dayawan, Villanueva, Misamis Oriental human nakaangkon og samad dinunggaban.

Sa report sa Northern Mindanao Medical Center (NMMC) nasayran nga unang nag-inom ang suspetsado ug ang biktima sa wala pa nahitabo ang insidente.

Naila ang suspetsado nga usa ka alyas Jingie kinsa kalit nga miluba sa biktima ginamit ang kutsilyo dihang nanghaubog na.

Nakaangkon ang biktima og samad sa iyang tuo nga bahin sa kilid diin migawas ang tina-e niini hinungdan na usab nga nawad-an kini sa panimuot sa dihang nadala sa maong balay tambalanan ning siyudad.

Sa pagkakaron nagpabilin pa ang biktima sa sulod sa NMMC samtang ang suspetsado ang nagpabilin pa nga gawasnon hangtod karong mga panahona. (KCS)