Inahan 'gikulata' sa anak

 KASAKIT SA INAHAN: Nanghuboy ang nawong ni Sa­turnina Arobo human nahiagom sa kamot sa iyang kaugali­ngong anak nga si Alberto nga giingong nikulata kaniya. Suspek gibalhug sa bilanggoan ug mihimakak nga iyang sigehan og dapat ang iyang inahan gawas lang niadtong duha ka higayon nga iyang gisumbag. / Benjie B. Talisic
KASAKIT SA INAHAN: Nanghuboy ang nawong ni Sa­turnina Arobo human nahiagom sa kamot sa iyang kaugali­ngong anak nga si Alberto nga giingong nikulata kaniya. Suspek gibalhug sa bilanggoan ug mihimakak nga iyang sigehan og dapat ang iyang inahan gawas lang niadtong duha ka higayon nga iyang gisumbag. / Benjie B. Talisic

Gikulata sa 36 anyos nga anak nga lalaki ang iyang 78 anyos nga inahan nga usa ka breast cancer patient sulod sa ilang barong-barong sa Sityo Kabalawan, Barangay Tabayag, lungsod sa Argao, habagatang Sugbo.

Base sa report nga nadawat ni Police Major Ivy Bartolome, hepe sa Argao Police Station nga niadtong Dominggo sa buntag, Hunyo 18, 2023, niabot ang suspek nga giila nga si Alberto Arobo nga gikatahong hubog niadtong higayona nga nangita, matod pa, sa iyang kuwarta nga mokabat sa P2,000.

Sa kapungot ni Alberto nga nahanaw ang kuwarta nga giingong iyang gitipig sa iyang gibutangan, gipahimungtan niini ang iyang inahan nga si Saturnina Arobo nga natulog pa niadtong tungora.

Giingong gipukaw og kulata sa suspek ang iyang mama nga maoy gipangitaan sa kuwarta.

Namuwa ang mata ug nanghuboy ang nawong sa biktima gumikan sa mga sinumbagan ug nagngulngol ang iyang dughan ilabi na nga aduna siyay breast cancer.

KULATADO

Gitug-an ni Saturnina nga sukad niadtong 2021 sigehan na siya og kulata sa iyang anak sa higayon nga kini mahubog.

Apan si Alberto nga gibalhug sa bilanggoan nga nahinabi sa XFm Cebu 88.3, nihimakak sa maong pasangil, apan niangkon nga sud lang sa duha ka mga higayon iyang nadapatan ang iyang inahan.

Gumikan sa kahadlok dili na buot pa ni Saturnina nga mopauli ang iyang anak sa ilang barong-barong kay posibleng dapatan na sab siya niini.

Ang bahin sa nawong sa biktima nga nanghuboy igo lang gitaptapan og dahon isip nagsilbing tambal aron mohiyos ang hubag niini.

Si Alberto gipasakaan sa kapulisan og kasong slight physical injury ug makagawas kini kon makapiyansa og P3,000.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph