UPAT ka mga suspetsado ang nasapon sa hiniusang drug bust operation nga gipahigayon sa kapolisan sa Bauk-Bauk, Barangay Puerto, Dakbayan sa Cagayan de Oro.

Gi-ila ang mga dinakpan nga sila Gina (bansagon gipugngan), Jerry Antisxo, Edward Dangucos, ug Zoren Bacus, pulos residente sa susamang dapit.

Ang hiniusang operasyon gilangkuban sa Police Station 6 sa Puerto ug Detective Management Desk sa Cagayan de Oro City Police Office (Cocpo).

Unang nadawat sa kapolisan ang report nga nalambigit sa pagpayuhot ug pagamitan sa ginadili nga druga ang upat ka mga suspetsado hinungdan nga gilusad ang operasyon kanila.

Sa maong operasyon nakumpiska ang mokabat lima ka mga pakete sa gitouhang shabu nga aduna'y gibana-banang kantidad nga P30 mil.

Gawas niini nakuha usab sa ilang posisyon ang mokabat duha ka pakete sa uga nga marijuana uban sa mga illegal drug paraphernalia.

Samtang gibutyag ni Gina nga nahimo niya kini tungod kay nagsakit ang iyang inahan ug wala siyay laing trabaho.

Ang mga suspetsado ning panahona ang gibalhog na sa prisuhan ug gikatakdang mag-atubang og kasong supak sa RA 9165 kon kalapasan sa Dangerous Drugs Act.