USA ka lider sa grupo ang nagpatabang sa kapolisan human giingong nabungkag ang 12 ka mga payag human gipangguba sa armadong grupo niadtong Martes sa Barangay Butong, lungsod sa Quezon, Bukidnon.

Gisaysay ni Datu Santiano Agdahan Jr. alyas Datu Andong nga giingong gihasi sila sa armado nga grupo nga nagsul-ob og kolor blue nga uniporme pinangulohan sa gwardya nga mao si Policarpio Bolongon Jr. diha sa awarded land sa Rancho Montalvan susamang dapit.

Miresponde deretso ang kapolisan gikan sa Quezon Police Station nga mao sila si Police Officer 2 (PO2) Jerson Autida ug PO2 James Paul Dargantes uban sa naka-duty nga mao ang mga miyembro sa Civic Volunteer Organization (CVO) apan pag-abot sa dapit gipamusil sila makapila ka higayon maayo na lamang kay sila nakatago.

Tungod niini daling miresponde sila si Police Senior Superintendent Edgar Mencion ug Police Superintendent Darryl Aranton uban usab ni Police Superintendent Jerwin Boyoro ug paghidangat sa dapit nakumpirma ang pagpanghasi nga natigayon human nakuha sa area ang upat ka mga basyo sa shotgun rifle ug ka basyo sa carbine riffle ug maayong pagkaguba ug pagkabungkag sa 12 ka mga payag nga gipanag-iyahan sa grupo ni Datu Andong.

Giingong gipangguba kini sa mokabat 30 ka mga gwardya sa giingong personahe sa Rancho Montalvan.

Gituohan nga bangi sa yuta ang motibo sa pagpanghasi hilabi na bag-o pa gi-award ang yuta.

Sa pagkakaron padayon pa ang imbestigasyon sa kapolisan.