GIPANEGURO sa mayor sa Digos City nga di makasud sa dakbayan ang gikabalak-ang synthetic rice o nailang pekeng bugas.
Sumala ni Mayor Joseph Peñas nga walay bisan kinsang negusyante sa dakbayan ang magbaligya sa merkado og mga pekeng bugas kay makansela ang ilang lisensya ug mawad-an sila og panginabuhian.
Sumala sa National Food Authority (NFA) nga daling mailhan ang pekeng bugas kun aduna kini lahi nga baho sa ibabaw o substance nga di masabtan.
Kahinumdoman nga tuig 2015, dihang naukay sab ang publiko dihang mikuyanap ang balita sa pekeng bugas apan miguwa nga wala kini kamatuoran.
Matud ni Peñas nga dali lang makaabot sa iyang buhatan ang kasayuran kun adunay mga ilegal nga ginahimong transaksyon sa dakbayan.
Kompyansa ang mayor nga walay mga ilegal nga kalihukan nga mahitabo sa siyudad human nga hugot ang monitoring sa gimugnang Masa Masid (mamayang ayaw sa anomalya, mamamayang ayaw sa ilegal na droga).
Gumikan niini, giawhag sa mayor ang mga molupyo nga itaho dayon sa iyang buhatan o dili kaha sa NFA kun mamatikdan nga adunay nagbinuang sa pagbaligya og bugas sa dakbayan. (Orlando B. Dinoy)