MOABOT na ko og kapin sa 50 anyos. Apan sa miaging Dominggo pa gyud ko nangutana ug nakigdiskusyon sa unsay kahulogan niining kasaulogan sa mga Muslim nga gitawag og Eid’ Fitr.
Lahi man gud kining nia kita sa Sugbo ug nagdako nga giingnan sa mga katiguwangan nga di kasaligan ang mga Muslim. Bunga kini sa atong kaagi isip taga Sugbo kaniadtong panahon pa sa mga Katsila nga nakiggubat sa mga Muslim sa Mindanao.
Nangutana ko sa miaging adlaw tungod niining kagubot karon sa Syudad sa Marawi nga mao ang usa sa mga sentro sa mga Muslim dinhi sa Pilipinas.
Giingon man gud sa mga balita nga kining Eid’l Fitr maoy selebrasyon sa pagkahuman sa buwan sa Ramadan. Dayon dunay mga greetings sa Facebook nga “Happy Eid’l Fitr” kay angayang malipayon sa mga adlaw.
Apan masulob-on ang mga panghitabo sa Marawi. Ug ang atong mga kaigsuonang Muslim dinhi sa Sugbo nangaliya alang sa pagtapos sa gubat ug sa pagpatigbabaw sa kalinaw.
Maayo na lang kay, bisan og dili Muslim, nagtubo sa Mindanao ang akong misis sa mga paninguha nga mopatigbabaw ang pagkasinabtanay ug ang kalinaw tali sa mga Kristiyano ug mga Muslim.
Makadasig sab nga dinhi sa Sugbo, duna kitay mga lider nga abli nga nakiglambigit sa mga Muslim ug tungod niini, sila na mismo ang nahimong atong first line of defense aron dili makasulod ang mga terorista sa atua.
Nasabtan na nako nga lahi kining tinuhoang fundamentalist kay sa niining gipraktis karon sa mayoriya sa mga Muslim nga Pilipino.
Miduyog ko sa pangaliya sa atong mga kaigsuonang Muslim alang sa kalinaw.
San Juan
Lahi sa selebrasyon sa mga Muslim, makauwaw alang kanako kining hinanggaw nga selebrasyon sa pipila ka mga Kristiyano sa adlaw ni San Juan.
Wa ko magpasabot sa nabatasan na nga mangaligo sa dagat o sa swimming pool.
Ang akong gipasabot mao kining pagpangatang sa mga mangaligo ug sabligan og tubig. Maayo lang lagi og limpiyo nga tubig, kini ra gyud ang hugaw kay kintahay mapugos sa pagkaligo ang maigo.
Duna pay uban nga manglabay og mga bato ug ihi.
Gani, gikataho diha sa LTFRB, PNP ug sa South Bus Terminal nga dunay nangatang sa Lutopan, Syudad sa Toledo ug Barangay Uling, Syudad sa Naga.
Mao niy ginaingon nga bisan unsang relihiyon, duna sab gyuy mga badlungon ug moarti subay sa tinuis nga pagtuo.
@anol_cebu sa Twitter