IMPRESIBONG kadaugan maoy gilihi sa Cesafi defending champion University of the Visayas Green Lancers sa pagsugod sa 2nd Mayor Kim Lope Asis Collegiate Invitational Cup pinaagi sa paglubong sa Emilio Aguinaldo College Generals, 95-74, sa Lope Asis Memorial gym sa Bayugan City, Agusan del Sur.
Sa pagpanginit sa mga kamot ni Tristan Albina kinsa mipabuto gilayon og upat ka triples, ang Lancers daling nakabulhot ug miposteg 24-6 nga labaw human sa first quarter.
Apan daw sa napugwat ang kahilom sa Generals sa dihang ang import nga si Sydney Onwubere miduslit sa rally aron nga ang 30-8 nga labaw sa Lancers pakubsan ngadto sa 22-37 nga labaw.
Pero bisan pa man niini, wa magpadala ang UV ug hinuon nagkumboya sila pagbalik sa pagpabukad sa labaw hangtod nga nahuman ang first half, 55-27.
Sa second half, wa mopakitag kompiyansa ang Lancers ug siguro kining miprotehir sa ilang 20 puntos nga labaw hangtod sa final buzzer.
Sila Rey Suerte, Geliant Delator ug Joshue Seguman midugang og tag 10 puntos alang sa Lancers samtang si Jerome Garcia ang nangulo sa Generals nga may 16 puntos.
Samtang sa laing duwa, ang Xavier University Crusaders mipukan sa University of Southern Philippines Foundation Panthers, 100-93.
Ang import nga si Richie Managor mitali og 15 puntos apan ang USPF wa makapahimus og maayo sa ilang Nigerian center tungod sayo kaayo kining na foul trouble ug napugos sa pagbiya sa korte sa katapusang 41.25 segundos human makakomiter sa iyang ikalimang foul.
Dinhi hingpit nga nadominar sa local-based Xaxier University ang momentum ug sila si LJ Aquino ug Billy Jadap maoy nakatampo ug igong suporta sa kadaugan.
Hangtod ning pagsuwat, ang UV ug XU mao na usab ang nagduwa alang sa liderato samtang karong butang ang UV ug USPF ang mag-engkuwentro.
Ang gipaabot nga panagsangka tali sa UV ug Universit of Santo Tomas gikatakda usab karong gabii sa alas 8:30 ang takna.