NALIPAY ang mga UV Express drivers ug operators human giwagtang na sa Land Transportation and Franchising Regulatory Board (LTFRB) Davao Region ang suspensiyon sa ilang rota padung sa Norte nga bahin sa rehiyon.
Kapin 500 ka mga UV Express drivers ug operators ang gitapok sa LTFRB ug gipasabot sa mga angay nilang buhaton aron mabalik ang ilang biyahe.
Mismong si LTFRB chair Martin Delgra III ang miatubang sa mga drivers ug operators kinsa nagpasabot sa mga regulasyon aron hingpit nga mabalik ang ilang biyahe.
"Motuman ta sa regulasyon. Nahibalo kini nga mga kalapasan tungod wa mo nagtuman, kay dunay mipaluyo aron maproseso mo, so karon di na kini mahitabo, tungod gisugdan nato'g limpyo ang ahensiya gikan sa giingong saburno," pagpasabot ni Delgra.
Una niini, gipasabot ni Delgra nga gihimo nila ang pagsuspende sa biyahe padung Norte sa nahitabong bangga sa Bunawan District niadtong Hunyo 16 nga gikamatay sa 11 ka tawo ug gikasamad sa lima ka kaubanang pasahero.
Migula sa imbestigasyon sa traffic section sa Bunawan Police Station nga kusog ang dagan sa UV Express nga gisakyan sa mga biktima diin wa mituman ang driver sa speed limit sa dakbayan.
Migula sab sa imbestigasyon sa LTFRB nga duna silay nadawat nga mga report nga ang mga UV Express nga van dunay gipangbutang nga mga booster chips aron kusog ang ilang dagan ug daling makaabot sa ilang destinasyon.
Tungod niini, gipalinya ang mga UV Express vans sa Old Airport sa Barangay Sasa Lunes ug Martes, Hunyo 26 hangtod 27, alang sa gipahigayong tagging sa LTFRB.
Gisuta sa tagging kung nakatuman ba sa resikitos ang mga UV Express operators ug kung nakatuman kini subay sa pag-inspeksyon, mamahimo na silang makabalik sa operasyon sa ilang mga biyahe.
Wa pa masayran kung kanus-a hingpit nga mabalik ang operasyon sanglit nagpadayon pa ang gihimong tagging Martes ug sa mosunod pa nga mga adlaw alang sa mga nagkadaiyang kolor sa UV Express ug mga pasaheroang van padung southbound.
"I-comply una nato kining mga requirements una nato kamo mabalik sa inyong operasyon," dugang ni Delgra sa gihimong panagpulong didto sa Linmar Apartelle, Agdao Davao City, Martes.