NIBIRA ang Southern de Oro Philippines College (SPC) og kaluhang daug kontra sa Xavier University (XU) atol sa duha ka division semifinals sa 13th Loyola Cup Basketball Tournament niadtong Domingo sa XU gym.
Niabante ang defending champion SPC Sharks sa college men’s division final agi sa 85-81 nga daug kontra sa XU Crusaders, samtang nimartsa sab ang jr. Sharks sa under-18 final human giparot nila ang XU Jr. Crusaders, 70-56.
Naangkon ni Justin Felomino ang anga nga “Kid Kilat” agi pagpangulo niya og 18 puntos sa kadaogan sa Sharks, samtang niabag sab og dako si Earl John Ibot, kinsa nikulit og 16.
Nakabenta si Felomino og eksplosibong opensiba sa second quarter human makita ang kahuyang sa depensa sa Crusaders.
Nakainat pa ang Sharks sa ilang kinataas nga labaw nga 21 puntos, apan wala kini nahimong komportable kanila.
Gihinayhinayan kini pagputol sa Crusaders agi pagkumboya nila CJ Maagad ug twin towers Mario “Swiss Bull” Piatti ug Jan Rey Manatad.
Nakamata sab ang Crusaders sa ilang depensa sa kataposang fourth quarter diin nasinati sa Sharks ang seryusong hulga.
Didto nakabuylo pagputol ang XU agi sa full-court pressure defense nila diin kalit lang namugnaw ang opensiba sa SPC.
Nipaduol pa ang XU sa duha ka puntos nga biya, apan nakabinat ang Sharks og igong labaw sa kapin usa ka minuto nabilin agi sa panag-usang pwersa nila Felomino ug Ibot.
Natuldokan pa sa SPC ang kadaogan agi pagkonektar ni Jif Motecalvo ang tulo ka freethrows diin parehas bando naa sa penalty.
“Kulaps mi kadyot sa depensa ug nakakuha lang kami og igong breaks sa dula,” ingon ni SPC coach Rey Dangcal.
Sa maong kadaogan, mosulay ang Sharks maangkon ang back-to-back title pagsangka nila sa Professional World Academy ni coach Oliver Kwong sa final.
Niabante ang PWA sa final human gitagak niini ang Philippine Countryville College sa Valencia City, 93-82.
Sa pikas bahin, mag-abot ang SPC jr. Sharks ug Bukidnon Faith Christian School sa under-18 final.