NIMARTSA na ang twin teams sa Misamis Oriental General Comprehensive High School (MOGCHS) ngadto sa ladies semifinals atol sa 2nd CdeO Inter-Public School Basketball Tournament niaging semana sa West City Central School covered courts.
Abante sab ang defending champion Cagayan de Oro National High School o City High Tigers ug visiting team Talakag National High School (TNHS) Highlanders sa under-17 boys semifinals.
Sulod sab ang guest teams Corpus Christi School ug Xavier University Grade School sa elementary semifinals.
Dakong tsansa ang MOGCHS ni coach Agustin Yasay Sr. nga malangkat ra gayud ang korona ngadto sa Indahag National High School Lady Skyhawks.
Dakong kalipay ang nabati ni Yasay human misulod ang duha niya ka teams nga ang MOGCHS BBG ug lady Cavaliers.
Naangkon sa MOGCHS BBG ang numero unong silya sa semifinal human giparot niini lady Cavaliers, 34-26.
“Deprensya karon kay gibahin nako sila kompirar sa una nga gitipok nako ang kinakusog nako nga mga players sa usa ka team,” ingon ni coach Yasay.
Gawas niana, uhaw kaayo si Yasay nga maangkon ang iyang unang titulo sa inter-public school, bisan tuod ang iyang MOGCHS maoy nagrepresentar sa Northern Mindanao sa umaabot nga Palarong Pambansa.
Sa pikas bahin, unang nisulod ang Tigers sa semifinal human gipaak nila ang MOGCHS Cavaliers, 77-56, samtang nisunod ang Talakag agi sa 61-50 nga daug kontra Macasandig National High School.
Solong naangkon sa Corpus Christi baby Knights ang liderato sa elementary boys division nga walay tatsa aron maangkon ang numero unong silya sa semifinal, samtang nagsunod nga XUGS baby Crusaders nga adunay 3-1.