MAAYONG hinumdoman sa kapulisan nga dili lang mga “badlongon” nga sakop sa PNP (Philippine National Police) ang nagpaluyo niining illegal nga sugal sa atong palibot.
Kining pasidaan ni Chief Superintendent Timoteo Pacleb batok sa mga pulis nga nagprotiher sa mga operator sa illegal nga sugal dili paigo kon walay kooperasiyon gikan sa komunidad.
Ang miyembro sa komunidad nga maoy numeru-onong kliyenti niining mga illegal nga sugal dunay igo nga impormasiyon kinsa kining mga operator.
Kon subayon nato sa milabay nga katuigan, nasayod ang kapulisan nga nilahutay kining matang sa sugal gumikan sa dagkong mga politiko nga nagpaluyo niini. Na-rekord kana sa atong mga balita.
Ayaw kog ingna nga mokakak si Pacleb hinungdan nga wala niya lakbiti sa iyang pasidaan ang mga politiko.
Dako kini nga negosyo ug lapad ang koneksiyon sa mga operator hinungdan man gani nga wala kini mahunong taliwa sa agresibo nga kampaniya sa kapulisan.
Mohunong lamang kini kon mismo ang komunidad moundang sab sa pagsuporta niining “kanseros” nga sugal.
Kining kampaniya batok sa illegal nga sugal dili mahimo sa kapulisan kon kuwang og suporta ang local government unit, labi na nga dagkong mga tawo ang posibling maligsan unya niini.
Busa, hagit usab kini sa City Hall ug sa Kapitolyo. Kinahanglan ilang iduso ang way puas nga kampaniya sa kapulisan.
Wa untay magpanuko sa pagdiga ngadto sa publiko kon kinsa man kining mga opisyal – sa gobiyerno o kapulisan, nga nangalambigit sa maong kahiwian.
Kay usahay ra ba, takulahaw lang mawala ang pangalan sa impluwensiyadong mga tawo kon dunay madakpan sa ronda. Unya ang ordinaryong mga runner maoy napusasan.
Dili ta motuo nga wala makaila ang kapulisan kinsa kining mga operator sa illegal nga sugal. Tingali, gipaabot lang nila ang insaktong tiyempo.
Ang kabalaka lang nato nga basin mapuk-ok unya ilang paggukod sa mga operator tungod lagi aning mga dagko ug gamhanan nga mga tawo nga nagpaluyo sa kalihukan.
Karon nga gisugdan kini ni Pacleb, nan, kinahanglan gayud iyang taposan.
Kompletohon niya pinaagi sa pagpaslak sa selda sa mga tawo nga nangalambigit sa sugal. Basin baya diha ra ta kutob sa pagyawyaw sa media.
Ug karon pa lang, oportunidad na kini usab sa Simbahan nga mobarog sa ilang katungod pagpanalipod sa ilang sakop. Ila untang suportahan kining kampaniya sa kapulisan pinaagi sa pagbadlong o pagbugnaw sa ilang mga parokyano nga naungo niining sugal, illegal man o dili.