NAANGKON sa XUHS 2007 ang silya sa St. Ignatius de Loyola Cup final human makalingkawas kontra sa Batch 2002 agi sa 68-60 nga daug atol sa 8th XUHS-ABA semifinal niadtong Biyernes sa Xavier Estates.
Gipanas sa Batch 2007 ang twice-to-beat advantage sa 2002 aron sangkaon ang Jammers 2005 sa final.
Gisakwat ni Ephraim Dahilan ang 2007 sa kadaogan agi pagpupo og 20 puntos, samtang niabag sab og dako si Jao Demecillo.
Naghulat lang ang 2007 og breaks sa dula sama sa ilang gibuhat sa niagi diin nidaug sila sa buzzer-beater.
Gikan sa dikit nga panagsangka, nakakuha ang 2002 og lima ka puntos nga labaw sa kataposang fourth quarter, 53-48.
Apan, nabalik kini sa sinugdanan human mibira ang 2007 og 7-2 run apil ang tres ni Odjie Roa diin natabla ang dula ngadto sa 55-tanan.
Nag-abot pa sa kataposang deadlock sa 59-59 ug nakakuha og igong “break” ang 2007.
Freethrows ang nakapadaug sa 2007 human sige sila makakuha og foul diin parehas teams anaa sa penalty.
Sige makakuha og fouls ang 2002 ngadto sa ilang high percentage freethrow shooters nga sila Dahilan ug Demecillo.
Naa ang duha ka saligando sa Jammers nga sila Jay Manulat ug Attorney Josey Abbu pagdula sa 2002 ug 2007 aron mosaksi sa kinsa ang ilang maagbat sa final.
Paglabaw sa 2007 paingon sa kadaogan, nilakaw ang duha nga morag nagbilin og mensahe: “See you in the finals”.