ANG Davao Region mikolekta og kinatibuk-ang lima ka bulawan, unom ka plata ug 10 bronze medalya aron mabutang sa ika-napulong puwesto sa overall sa State Colleges and Universities Athletic Association (Scuaa) National Games 2018 didto sa Sibalom, Antique.
Kini ang pahayag ni University of Southeastern Philippines (Usep) sports director and Philippine Association of State Universities and Colleges (Pasuc) Region 11 Dr. Jose Alther Rivera atol sa Facebook interbyu sa Sun.Star Davao diin misaka og puwesto ang rehiyon gikan sa ika-11 niadtong milabay nga tuig.
"So far maayo man, nagkulang lang jud sa preparation since maglisud mi og manage sa schedule sa mga bata kay pressure sila sa academics," dugang niya.
Si Swimmer Juan Antonio Mendoza sa University of the Philippines (UP) Mindanao ang nangulo sa tim nga dunay duha ka bulawan, duha ka plata ug usa ka bronze.
Samtang si Usep's Kleinn Bacalso Mataverde midaug sab og bulawan pinaagi sa pagdepensa iyang titulo sa men's arnis samtang sila Roxette Ortiz ug Jennilyn Morcillo dunay tag-usa ka bulawan sa women's karatedo ug women's arnis events, sa maong han-ay.
Ang mga silver medalists mao sila Devine Grace Barcelon (women's arnis), Elwin Centillas, Gil Molina, Joey Montero ug Gascar Emmanuel (lawn tennis).
Naka-bronze sab si Ortiz kauban sila arnisadors April Rose Ganas, Karla Mae Yordan, Catherine Lei Revilla Segura, Kenneth Cordova, Divino Jay Cantones ug Loren Banayag.
Nagpasalamat sab si Rivera sa suporta sa Pasuc Region 11 board ug president ug nanganti nga paningkamotan nga molambo ang ilang puwesto matag tuig.
"Dapat tutukan ang mga individual and dual sports like arnis, swimming, karatedo, taekwondo and tennis, etc.," ni Rivera. (ABM)