KAPIN 30 ka tuig na human namugna ang 1987 Constitution apan walay balaudnon nga nakalusot sa Congress aron mapatuman ang Anti-political Dynasty. Nakalatid sa Section 26, Article II nga nagkanayon "The state shall guarantee equal access to opportunities for public service and prohibit political dynasties as may be defined by law."
Walay nakalusot nga balaudnon sa milabay nga mga hut-ong sa Kongreso tungod sagad sa mga politiko dunay mga kabanay nga nagkupot og katungdanan sa lokal, probinsiyal, Kongreso ug uban pang buhatan sa gobyerno apil sa national.
Subli nga mipasaka si Congressman Feliciano Belmonte Jr. niadtong 2016, maingon man ang pipila ka mga sakop sa Senado sa maong balaudnon kay nabasura kini niadtong 2015 panahon nga si Belmonte mao pa ang Speaker sa ubos Balay Balauranan o Congress.
Dili kini prayoridad sa mga kongresista mao nga nahuman ang ilang termino nga igo lang nakaabot sa second hearing ang balaudnon ug nabasura kauban sa Bangsamoro Basic Law hangtud sa ilang pagbuwag niadtong bulan sa Hunyo 2015.
Sa maong balaudnon nga gibalik pagpasa ni Belmonte, siya nagkanayon nga naa ang political dynasty kon ang duha o mas daghan nga kabanay o nalambigit tungod sa kaminyuon ang naa sa panerbisyo sa gobyerno mao nga panahon sa eleksiyon gikinahanglan nga magsabot sila kinsa ang modagan o kaha ipaagi sa raffle aron madeterminar kinsa ang modaug.
Sa senado sa laing bahin, daghan sab ang mga senador sa samang tuig ang nag-file sa bill aron buhion kini. Kasagaran sa mga nagapaluyo mga sakop sa minority apan duna say pipila nga kabahin sa majority block sa Senado.
Sa panglantaw sa uban, dili maayo ang political dynasty kay daw gihimo na nila nga panginabuhian ang pagkahimong opisyal sa lolal man o nasyonal nga puwesto.
Mag-abot ang magka-pamilya sa Senado, Kongreso ug sa lokal nga mga buhatan kay dunay mga pamilya nga kanunay pilion sa katawhan labi na kon kusog mohatag panahon sa eleksiyon kay sakto sa panapi, o matud sa uban nagkupot sa Gold, Guns and Goons.
Nahitabo na kini sa probinsiya sa Maguindanao niadtong gamhanan pa ang pamilyang Ampatuan. Halos tanang dapit gikan sa probinsiya paubos sa lungsod hangtud sa barangay gikuptan nila.
Gani man nagbuhat og lungsod ang amahan aron lang dunay pamunoan ang iyang anak.
Daghan sab niini sa tibuok nasud. Matud ni Senador Richard Gordon, daghang mga anak sa abogado ang misunod sa propesyon sa ilang mga ginikanan ug nahimo sab nga mga abogado.
Daghang mga anak ang misunod sa propesyon sa ilang mga ginikanan kay mao kini ang palibot o kinaiyahan nga ilang namat-an.
Sa yanong hut-ong sa katawhan, mga bata nahimong boksidor tungod boksidor ang ilang mga ginikanan, mga mananagat maoy nanunod sa bugsay ug sakayan sa ilang amahan busa nganong ato mang did-an ang mga kaliwat sa mga politiko nga mokupot sa katungdanan sa kagamhanan?
Dili managsama ang sitwasiyon sa mga dapit kay tinuod nga duna pay daghan nga ikambyo ang ilang mga boto sa kuwarta ug mga de-lata panahon sa eleksiyon apan utokan ug nagmata na ang mga botante karon kay kamao na moingon nga dawaton nila ang paon apan iluwa ang taga kay gusto na og kabag-ohan.
Ato kining ipadayon sa paghisgot sunod Huwebes kay taas pa ang atong tukiunon.