NIULI ang Southern de Oro Philippines College ug ang Corpus Christi School og tag-duha ka titulo paghuman sa 13th Wilson Loyola Cup Basketball Tournament niadtong Domingo sa Xavier University Gymnasium.
Gihari sa SPC ni coach Rey Dangcal ang college men ug 18-under boys division, samtang gihawod sab sa Corpus ni coach Carlo Dagalea ang 15 ug Under-11 boys categories.
Naagkon sa SPC Sharks ang back-to-back title sa college men’s division human giparot nila ang Professional World Academy ni coach Oliver Kwong, 90-75, sa final.
Naunhan sa Sharks ang PWA agi pagbinat sa ilang kinataas nga labaw nga 21 puntos ug namintar nila ang komportableng labaw paingon sa kataposan.
Daug sab ang Jr. Sharks agi sa 84-76 nga kadaogan kontra sa Bukidnon Faith Christian School pagsangka nila sa 18-under final.
Wala maharus sa Corpus ang tulo nila ka final nga dula ug nakaipsot ang usa.
Gipilde sa Corpus jr. Knights ang San Isidro National High School, 70-64, atol sa ilang 15-under boys final, samtang daug sab ang Corpus baby Knights kontra sa Xavier University Grade School, 63-37, sa ilang pagsangka sa Under-11 final.
Apan, naangkon sa Bukidnon Faith ang under-13 title human gipilde nila ang Corpus Christi, 62-53.
“Nasipyat ang usa, but it is okay with me. Dawat namo kay we are still gelling with new rosters sa 13-under,” ingon ni coach Dagalea.
Ang Jr. Sharks ug ang Bukidnon Faith mao ang magrepresentar sa Cagayan de Oro sa umaabot nga 18 ug 13-under Smart Breakdown Basketball Tournament karong Marso sa Manila.