NIBIRA og unang dugo ang XUHS 1995, 2001 ug 2005 batok sa ilang kadaiyang kaatbang sa division cup final atol sa 8th XUHS-ABA best-of-three finals, diin gisugdan ang mga game one niadtong Biyernes ug Sabado didto sa Xavier University Gymnasium.
Usa nalang ka daug ang two-time ABA champion Batch 1995 alang sa ikatulo ug unang St. Francis Xavier Cup title human giunhan niini ang defending champion Alumni 1994, 69-58, sa ilang game one.
Nagbangis si Jan-Jan Geroy og 22 puntos aron mangulo sa kadaogan sa 1995.
Sa pikas, gisurprisa sa XUHS 2001 ang Gamba 97 agi sa 65-57 nga daug aron mopaduol sa St. Peter Faber Cup title.
Nipupo si Nino Cadiz og 22 aron mangulo sa 2001, samtang dako sab og papel sila Malik Ampuan ug Mark Mayone.
Parehas teams uhaw moangkon sa ilang unang titulo, apan ang 2001 maoy naay unang maingon.
Preparado kaayo ang 2001 ni coach Rey Dangcal pag-unsaon pagpugong ni Niku Benson Valles, kinsa nitala gihapon og 24 puntos taliwala sa kapildehan Gamba.
Tinguha lang sa 2001 nga dili moabot si Valles sa kapin 30 puntos ug dili siya makapasa og maayo sa iyang kauban.
“Gi-deny namo siya sa iyang driving lane. Bahala og makapuntos pa siya basta minus iya outlet saiya kauban,” ingon ni Dangcal.
Matod pa ni Dangcal, napwersa sab si Valles og mga tunrovers sa dula.
Kini kay nasamdan na ang Gamba, dakong posibilidad nga motunga na si ex-San Miguel Beer forward Bitoy Omolon.
Sa St. Ignatius de Loyola Cup final, nagkalayo si Jeff Yaranon og 24 puntos aron mangulo sa 80-75 ng daug kontra sa 2007 sa game one.
Tanan game two gidula kagahapon sa ning pagsulat.