Oro-MisOr nakadaug ra gyud sa Davao All-Stars

LANANG, Davao City -- Makapahulay na gyud og ensakto si anhing national master Roger Verganio sa pikas nga kalibutan.

Kini, human matala sa iyang Cagayan de Oro-Misamis Oriental chess team ang unang kadaogan kontra sa Davao All-Stars, 18-12, atol sa 4th Mindanao Goodwill Match niadtong Biyernes didto sa Damosa, Barangay Lanang, Davao City.

Gididikar kining daug kang Verganio, kinsa ang orihinal nga miyembro sa Cagayan de Oro-Misamis Oriental atol sa tulo ka sunodsunod nga goodwill match ug napanaw sa laing kalibutan niadtong Disyembre.

Kusog kaayo ang pagsugod sa Cagayan de Oro-Misamis Oriental chessers sa unang round labina nga sila ang nakabunlot una sa puti nga pyisa.

Sa maong sitwasyon, naunhan nila ang Davao agi sa 9.5-5.5 nga daug sa unang round.

Nihatag og daug sa maong round mao sila National Master Levi Mercado, Johnnel Balquin, Nazario Ubanan, Domingo Oga, Fr. Vic Arellano ug ang upat ka kanhi saligando sa Far Eastern University (FEU) chess team nga sila Lennon Hart Salgados, Alfredo Rapanot, Antonio Chavez, ug Christian Arroyo.

Apan, lamang gihapon ang Cagayan de Oro-Misamis Oriental sa sunod ug kataposang round paghawid sa itom nga pyisa agi sa 8.5-6.5 nga daug kontra Davao ug angkonon ang unang tilaw sa korona.

Krusyal ang mga daug nila Balquin, Bong Vasquez, Jun Gunayan ug NM Rustum Tolentino aron sementohon ang daug.

Samtang, nihawid sab sila Salgados, Rapanot, Chavez, Arroyo, Allan Cantonjos, Ubanan, Oga, Bryan Jose ug Barangay 23 chairman Jaime Joshua Frias og mga tabla batok sa ilang kadaiyang kaatbang.

“We dedicated the win for Roger busa nagpakusog ang team para malipay sab to siya sa bisan naa na siya sa laing kalibutan,” ingon sa Cagayan de Oro-Misamis Oriental spokesman Ismar Estrella.

Dako kaayo ang bili sa presensya sa FEU boys kay maoy nihatag og dakong pwersa sa regular boards.

Mga chessplayers sa kadalaing lugar sa Mindanao nipabor sa Cagayan de Oro-Misamis Oriental tungod sa llamadong line-up labina nga nag-ampo sila nga makaiskor ra og daug ang team kontra sa Davao.

Lamang pa lang gihapon ag Davao sa lifetime score kontra sa Cagayan de Oro-Misamis Oriental sa iskor 2.5-1.5 diin nidaug ang Dabawenyos sa una ug ikatulo nga matches ug nagtabla sila sa ikaduha nga panagtagbo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph