GIHAWOD sa Misamis Oriental General Comprehensive High School (MOGCHS) ug sa guest team Corpus Christi School (CCS) ang ladies ug elementary boys division sa 8th CdeO Inter-Public School Basketball Tournament niadtong Domingo sa Nazareth Gym.
Nagpatunga na daan si coach Agustin Yasay human mag-unay ang iyang MOGCHS teams nga ang lady Cavaliers ug MOGCHS BBG sa ladies division final.
Sa kataposan, naangkon sa lady Cavaliers ang kampyonato agi sa 48-29 nga paglatos sa MOGCHS BBG sa final.
Igo lang nanan-aw si Yasay duyog sa MOGCHS fans sulod sa gym kay alang kaniya kampyonato na alang kaniya sa kinsa modaug tali sa duha.
Mao ni ang unang titulo ni Yasay sa lima ka hugna nga inter-public tournament apil na gikan sa Oro Speed league ni Atty. Hilarion Raagas.
Nilanding ang BBG sa ikaduha nga pwesto, samtang naa ang Indahag National High School lady Skyhawks ug Carmen National High School sa ika-tulo ug ika-upa nga pwesto, sunodsunod.
Naangkon sab sa Corpus baby Knights ni coach Carlo Dagalea ang elementary division agi sa 52-44 nga daug kontra sa usa pa ka guest team nga ang Xavier University Grade School (XUGS) ni coach Mariano Velez sa final.
Ginganlan sab ni tournament director Raul Fuentes ang mga mythical five, best coach, most improved player ug most valuable player sa kadayang kategoriya.
Nanganlan sila Josefee Perez (Carmen NHS), Angelica Jane Somo (Indahag NHS), Princess Penalosa (MOGCHS), Rubelyn Guno (MOGCHS) ug Hannah Mae Go (MOGCHS) sa ladies mythical five.
Si Cheska Apag (MOGCHS) ang most improved player, samtang si Pauline Valle (MOGCHS) ang MVP sa division. Dili sab ikalimod nga si Yasay ang best coach sa season.
Sa elementary boys, sila Joneal Pacteres (South City Central School), Jhon Ruich Blanco (Bulua CCS), Jarl Jovan Artango (Corpus), Jessie James Tabanas (XUGS) ug Christian Joseph Bustillo (Corpus) ang nanganlan sa mythical five.
Nahimong most improved player si Alec Jhon Solis, samtang MVP sab si Bustillo.
Si Dagalea ang best coach sa elementary boys.