ISIP kabahin sa selebrasyon sa 81st Araw ng Dabaw, ang Davao-South Regional Football Association (DRFA), Inc. kauban ang Sports Development Division-City Mayor's Office (SDD-CMO) magpahigayon og duha ka torneyo sa Marso 17 ug 24 sa managlahing venues.
Sa gipadalang sulat ni DRFA officer Rachelle Delos Reyes, sa SunStar Davao, miingon nga gikan Marso 17 hangtud 18, mopahigayon sila og futsal tournament nga gisuportahan sa University of the Philippines (UP) Mindanao, Siki ni Oble, Barangay Mintal, ug Office of Congressman Alberto T. Ungab, didto sa University of the Philippines (UP) Sports Complex Training Gymnasium.
Ang maong kompetisyon idedikasyon alang sa mga kababaihan nga dunay duha ka kategorya lakip ang youth (gipaganak 2,000 pataas) ug open (gipanganak 1993 onwards).
Duna napulo ka puwesto alang sa matag katerogya nga matag tim gilangkuban og 12 ka magduduwa.
Ang rehistrasyon matag tim nagkantidad og P500.
Mga medalya ang naghulat sa tulo ka tim nga nanguna.
Ang futsal event sundan sa football tournament sa Marso 24 hangtud 25 didto sa Tionko Football Field.
Ang kategorya mao ang U17 boys, U17 girls, U13 boys, U9 mixed, U15 boys, ug men’s and women's open.
Alang sa mga interesado nga tim nga mosalmot, kontakon si Delos Reyes sa numerong (0926) 65-08-203. (MRP)