PAGALUNGAN, Maguindanao Province -- Milusad ang militar og airstrike batok sa gituohang mga terorista alas 11:20 sa gabii niadtong Martes.
Gibutyag ni Joint Task Force Central Spokesman ug CMO Mindanao Regiment Commander, Colonel Gerry Besana nga gibombahan sa F-50 Fighter Jet sa Tactical Squadron sa Philippine Air Force ang gitagoan ni Shiek Esmail Abdulmalik, alyas Kumander Abu Toraifie ug mga kauban didto sa Sitio Tukananes, Barangay Nabalawag, Pagalungan.
Upat ka terorista ang kompirmado nga napatay nga sentrong naigo sa pagpamomba sa PAF. Apan nakaipsot si Kumander Toraifie nga nagtago duol sa gibombahan nga lugar.
Samtang usa sab ka sibilyan ang namatay samtang duha ka bata ang grabeng naangol human maigo sa tipaka sa improvised explosive device (IED) sa dihang gipabusikad sa mga terorista daplin sa kalsada.
Mga sibilyan niadtong tungura, nanagan aron unta nga manago sa luwas nga dapit tungod sa tumang kahadlok nga maipit sa kagubot.
Gitumbok sa mga awtoridad nga si Shiek Esmail Abdulmalik, alyas Kumander Abu Toraifie mao nay amir sa mga terorista sa Mindanao hulip kang kanhi Kumander Isnilon Hapilon. (Edgar E. Fuerzas)