NAKABSAN sa kinabuhi ang usa ka barangay tanod human gipusil sa Cafgu diha sa Barangay Cauyunan, lungsod sa Opol, Misamis Oriental.
Giila ang biktima nga mao si Faustino Catillion, 58, minyo, usa ka Brgy. Tanod sa maong barangay.
Gitumbok nga suspek giilang si Toto Jabien, hingkod ang edad, lumad nga taga Tumpagon ning dakbayan sa Cagayan de Oro ug usa ka sakop sa Citizens Armed Forces Geographical Unit (Cafgu) nga nadestino sa maong barangay.
Ang asawa ni Fausto nga si Adelina misaysay nga adunay kalihokan niadtong gabhiona ang barangay subay sa kasaulogan sa kapistahan dihang kalit lang adunay namusil.
"Hubog ang Cafgu ug natingala ko nganong akong bana iyang gipusil. Gipusil gyod siya kay wala may away didto. Kadto ra ang Cafgu nagpabuto." Kini ang tipik sa pahayag ni Adelina ug gipugos nga walay kagubot nga nahitabo atol sa kalihokan nga singing contest.
Nasuta nga M16 rifle ang gituohang gigamit sa suspek niadtong gabhiona kay mao man kini ang isyu kaniya.
Migawas sab ang report nga nagmaoy kining suspek gumikan sa labihang kahubog ug gibadlong sa tanod apan padayon pa kining gisuta karong panahona kon unsa kini ka tinoud.
Nasuta sab nga uwahi na kaayo nareport ang maong insidente ug tunga na sa kagabhion hinungdan nanagana usab sa pagsaka sa bukid ang kapolisan sa kabalaka nga atangan ug banhigan sa walhong grupo.
Kagahapon sa buntag gisaka sa kapolisan ang maong barangay gumikan sa kalayo niini ug naaresto ang suspek nga anaa na karon nga gidetanar sa kapolisan sa Opol Police Station.