Sakop sa MILF gipusil, patay

PIKIT, North Cotabato -- Patay ang usa ka sakop sa Moro Islamic Liberation Front (MILF) sa pagpamusil alas 10:25 sa buntag niadtong adlaw nga Sabado.

Giila ang biktima nga mao si Hashim Guiamelon Kamanso,31, minyo ug sakop sa 118th Base Command sa Bangsamoro Islamic Armed Forces (BIAF) sa MILF.

Gibutyag ni Superintendent Bernard Tayong ang tigpamaba sa Cotabato Police Provincial Office nga samtang nagtindog ang biktima sulod sa merkado publiko sa Pikit Cotabato, kalit lang siyang giduol sa duha ka wala mailhing tawo og gipusil gamit ang kalibre .45 nga pistola.

Abtik sab nga miikyas ang mga suspetsado sakay sa usa ka motorsiklo paingon sa hilit nga dapit sa Pikit.

Patay gilayon si Kamanso nga naigo sa iyang ulo ug likod nga parte sa lawas niini.

Walay nakaila sa mga sibilyan sa mga namusil sa biktima gumikan pulos sila naka-helmet ug kalit sab kaayo ang hitabo.

Dako sab ang pagtuo ni Pikit Mayor Sumulong Sultan nga posibleng personal nga atraso o rido ang motibo sa pagpatay sa biktima.

Hangtud karon blangko pa ang kapolisan sa mga tawo nga dunay kalabutan sa pagpatay kang Guiamelon ug padayon pa silang nag-imbestiga.

(Edgar Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph