DAGHANG nahibulong nga dali naaprobahan sa Ubos-Balay Balauranan ang Bangsamoro Basic Law (BBL). Karon giimbestigar na ang suspetsadong Chinese crime lord nga si Wang Bo tungod sa pasangil nga pagpanoburno .
Sumala sa usa ka reporter sa pamantalaan nga gisoburnohan kuno ni Wang og $10 million (P450 million plus) ang mga kongresista aron mapasar ang BBL. Ang uban niini alang sa campaign fund sa Liberal Party (LP). Gipaagi kini sa Malacañang. Wa kini labut sa $100 million (P4.5 billion plus) nga suborno alang sa kadagkuan sa Bureau of Immigration (BI), diin siya gitanggong, aron mapirmahan ang iyang release paper.
Kini si Wang usa ka pinangita’ng kriminal sa China. Mihangyo gani ang maong nasud nga ideport na siya aron matanggong didto sa China. Apan morag adunay nangusog nga magpabilin siya dinhi sa Pilipinas.
Kon tinuod kini, migamit na diay sa naandang taktika sa pagpanoburno ang gobiyerno aron lang makuha ang ilang gusto- pagpasar sa BBL.
Mayor Rama ug Sen. Drilon
Naglibog ang mga botante dinhi sa Cebu City sa labok ni Senate President Franklin Drilon. Una niini, giimbitar ni Drilon si Rama nga mutambong sa Independence Day celebration uban kang Pres. Aquino sa Iloilo City. Gibalibaran kini sa mayor. Wa ko kahibawo kon unsay iyang katarungan apan napasakitan na si Rama nila ni PNoy ug ni Interior Sec. Mar Roxas nga dili gani manumbaling kaniya unyag anhi nila sa Cebu City. Hinunoa si kanhi Kong. Tamas Osmeña ang kanunay itangkil nila.
Nahibung ako nga bisan og gibalibaran ni Rama ang imbitasyon motabang man hinuon si Drilon sa pagpangita og dakung salapi aron igasto sa pagpaanindut sa Guadalupe river ug sa Mahiga creek.
Ang ubang mga tawo nagtuo nga labaw pa niining maong proyekto tingalig buot danihon ni Drilon ang mayor nga mobalik sa LP aron adto mosuporta kang Roxas sa pagka-presidente kay nagduda sila nga ang BOPK adto mopaluyo kang Davao City Mayor Rodrigo Duterte.
Wa paman hinuon mahibaw-i kon si kinsa ang modagan sa pagka-presidente apan ako usab nagtuo nga namugas-pugas na ang dakung haligi sa LP nga si Drilon.
Kanhi Kong. Pablo Garcia
Nitambong ko sa forum kalabut sa Bangsamoro Basic Law (BBL) nga gihimo sa sulod sa Archbishop’s Palace niadtong milabay’ng Martes. Didto akong nakita ug nabati si kanhi kongresista Pablo Garcia nga midiskurso supak sa pagpasar sa BBL.
Samtang iyang gibatbat ang mga katarungan kon nganong supak sa konstitusyon ang BBL, nakadayeg ako sa kalantip pa sa iyang pangisip bisan kon 90 anyos na ang iyang edad.
Wala siya magbasa og script sa iyang diskurso ug memorize niya ang mga probisiyon sa atong batakang balaud. Ako nagtuo nga siya maoy usa ka dakung katarungan nganong mibotar ang mga nanambong og 242 nga ibasura ang BBL ug 35 lamang ang uyon niini.
(msr1144@yahoo.com)