MOSUNOD kaha ang atong dakbayan?
Dunay nag-ong-ong nga ordinansahon karon sa dakbayan sa Baguio nga magdili sa mga tawo nga maghubo sa publikong mga dapit. Kining paghubo gipasabot sa konseho nga walay sinina sa ibabaw nga bahin sa lawas.
Ang numero-unong katarungan mao nga aron mapalig-ong ang maghatag kini og maayong imahen sa kalimpiyo sa dakbayan. Law-ay pud hinuon tan-awon kining mga tawo nga makita walay mga sapot.
Dili kini maoy unang higayon nga giduso kining dress code nga ordinansa sa dakbayan. Ang pipila ka mga syudad nga dunay ordinansa batok sa paghubo mao ang Marikina City, Manila, San Juan City, ug Pasay City.
Dinhi sa atong dakbayan, yano lang kaayo mopakita sa ilang lawas ang mga lalaki, hamtong, tiguwang ug mga bata, sa bisan asang dapit. Makita nato ang mga trabahanti sa construction, diha sa isdaan, kamerkadohan walay sinina sa ibabaw.
Apan, bisan sa kainit sa atong panahon, dili baya gyud maayo tan-awon ang tawo nga walay sapot.
Hangtod karong panahona wala man tingaliy mireklamo. Murag gidawat na sa kadaghanan nga pwede mopasundayag sa ilang mga lawas ang mga lalaki nga walay hapin gawas sa purol o karsones.
Hinuon kon nuntan gyud nato ang insaktong panggawi, ngil-ad gyud sa usa ka tawo nga maghukas sa publiko bisan pa kon maskulado siya. Mas law-ay tan-awon kining magbutod ang tiyan unya walay sinina.
Kon mopasar ang ordinansahon sa Baguio, ang makalapas pamultahon og P1,000 uban sa community service o pagtrabaho alang sa komunidad.
Duna bay lig-ong katarungan nganong dili angay sundon nato ang gibuhat sa ubang dakbayan paghimo og dress code?
Yano lamang kining ordinansaha, apan dako baya kaayo ni og epekto sa pag-establisar og maayong imahen sa usa ka dapit.
Kon duna tay dress code dinhi sa Cagayan de Oro, segurado nga modako ang respeto sa atong mga bisita, torista ug mga dayo.
Dili man tingali lisod kon himoon sab nato dinhi sa dakbayan. Apan, kon duna tay kampaniya batok sa dress code, nuntan sab nato og suporta ang ordinansa. Dunay mga non-profit organization nga pwede magpasiugda sa pag-apod-apod og sinina alang niadtong wala gyuy masul-ob. Sa ingon niini, walay makapangulipas nga nagkuwang ang dakbayan sa ilang kampaniya batok sa maghukas sa publikong dapit.
Sa tinuod lang, mas maayo man gani pud did-an kining mga kababayen-an sa pagsul-ob og pinakigol nga short pants. Tingali maghimo pud ta og dress code para sa mga babaye.
Hinaut lang ta nga malantawan sa atong mga konsehal ang ubang dakbayan nga nagpatuman sa dress code aron ilang sundon usab dinhi sa dakbayan.
Dili malikayan nga dunay mosupak niini apan dili daghan. Ang matag ordinansa duna man poy exemption. Dili man pud pwede ipatuman sa mga tawo nga miapil og programa pagpasundayag sa ilang binistihan sa ilang tribu. Daghang pwede matugotan segun sa kirkumtansiya sa panahon.
Ang important niini mao nga duna tay dress code nga nagtuboy sa kaligdong sa atong pagkatawo ug nagpalig-og sa atong imahen isip limpyo nga katilingban uban sa maayong respeto ug maayong gawi.