GIAPRUBAHAN sa House of Representatives kagahapon ang balaodnon nga maglegalisa sa divorce sa nasud.
Subay sa talaan, mipabor 134 ug 57 ang misupak, duha ang wa miboto sa House Bill No. 7303 – “An Act Instituting Absolute Divorce and Dissolution of Marriage in the Philippines.”
Ang balaodnon magtugot sa magtiayon, kansang kaminyuon di na maremedyohan, nga makakuha og absolutong diborsyo ilawom sa mga limitasyon aron panalipdan ang kabataan sa kasakit tungod sa suliran sa kaminyuon sa ilang mga ginikanan ug magtugot sa mga diborsiyadong magtiayon nga makaminyo pag-usab.
Ang sumbanan sa absoloto nga diborsyo mao ang rason nga gilatid sa legal separation ug annulment sa Family Code of the Philippines, panagbuwag sud sa lima ka tuig, legal nga panagbuwag sa judicial decree, sikolohikal nga inkapasidad, di mahusay nga panagbangi, hiniusang petisyon sa magtiayon.
Ang balaodnon usab nagtugot sa unom ka buwan nga mandatory nga pagpabugnaw sa gibati sa magtiayon, ug magrekognisa sa panag-uli pinaagi sa manipesto nga isumite sa korte.
Human nakalabang sa Kongreso, iduso na ang balaodnon sa Senado. Apan, hingpit kaha kini nga mahimong balaod?
Kini nga pangutana nagtangag og tanghaga tungod kay nagpadayag si Pangulong Rodrigo Duterte sa iyang pagsupak, nan, labing seguro iya kining i-veto.
Sa SuperBalita Facebook page, managlahi ang opinyon sa mga netizens kagahapon.
Si Richard Ryan Joyce nagsulti nga: "If you love someone you have to let them go... Ang kumusta ang daghan mga anak. Aside from broken family, unsaon pagsustento ang mga bata. Okay lang mag-asawang naay kakuhaan nga insakto. Kana gyud mapakaon, masaninaan ug mapa-eskwela og tarong mga bata. Yun..."
Si Bader LP Bofteen nagsulti sab nga: "Uyon oi! Nganong pugngan nimo nang tawo og wala nay paghingugmaay sa matag usa! Walay kalinaw ang pamuyo!"
Si Ferdinand Mozo mipadayag sab: "Ug naay ikagasto? Mas importnte ang bugas karon labi na kay wa nay NFA rice, haskang paita."
Midugang sab si Rio Lim Guapa, "Uyon, pero unta dili pod kaayo mahal. Basin mga datu ra pod maka afford."
Si NUj-alion Alion nikomento sab: "Unsay pulos diay nang inyong gisumpaan nga kasal nga moingon pa mo sa atubangan sa pari ug gisaksihan sa daghan tawo nga kasakit ug kalipay mag-inunungay... Unsa na? Fake na...?
Si Sinadhan Metoda Geralyn niingon nga: "Haaay salamat, pwede na ba
mag-process og divorce ugma? Libre bah?"
Ang matag usa kanato dunay punto, apan angay huna-hunaon sa mga Senador kung solusyon ba ang divorce sa pamilyang Pilipino.