SUPERBALITA DAVAO

Midaub sa anak naghikog

MISULAY paghikog sud sa selda ang amahan nga maoy midaub sa iyang tres-anyos nga anak alas 10 sa gabii niadtong Dominggo, Marso 18, sa ilang panimalay sa Purok 26, Malagamot, Barangay Panacan, Davao City.

Sa pakighinabi sa SuperBalita sa suspek nga si Randy Nueva Cadiente, 44, minyo, construction worker, iyang gibutyag nga gusto na sab siya magpakamatay human iyang nasayran nga namatay na ang iyang anak alas 6 sa gabii niadtong Lunes.

"Gusto na pod ko mamatay ug mawala sa kalibutan, kay nawad-an gayud kog panimuot sa akong kaugalingon ato labi na kay naglagot ko sa pagbulag namo sa iyang mama," ingon sa amahan.

Dugang sa suspek nga diha na siya nakahinuklog sa iyang gihimo sa dihang anaa na siya sud sa prisohan ug nakaangkon na siya og daghang bun-og sa kalawasan human giayo'g kulata sa mga kaubanang piniriso.

"Gidawat nako ang pagkulata nila sa akoa ug gusto na pod lagi ko mamatay, para mahuman na ang tanan," butyag sa suspek.

Sa pagpanubay sa SuperBalita sa Purok 26, gibutyag sa mga silingan sa biktima nga dugay na silang nakamatikod nga ginadagmalan ang bata ug nakahukom na unta sila niadtong Lunes nga isumbong kini sa barangay, apan nahitabo ang pagsunog Dominggo sa gabii.

"Mosumbong na gyud unta mi sa barangay, pero nadisgrasya na gyud tawon si Inday. Ang amoa lang, grabe pod bisan ang barangay walay mga pagpanubay sa hitabo, ug wala alang gyud pod naka-report sa barangay," ingon sa silingan nga si Rosalie Navacilla.

Sa kasamtangan, ang patay nga lawas sa bata anaa sa morgue sa Southern Philippines Medical Center samtang giasikaso na sa City Social Services and Development Office (CSSDO) ang pagpahiluna sa haya sa biktima.

Gibutyag sab ni Chief Inspector Emerson Pugong, hepe sa Sasa Police Station, nga wala pa nila mapasaka ang kasong Parricide gumikan gihulat pa nila ang death certificate sa biktima.

Gikuha sa Superbalita ang kabahin ni Davao City Mayor Sara Duterte-Carpio pinaagi sa City Information Office apan wala pa kini gipagula nga pamahayag.

Kahinumdoman, naitok si Mayor Sara sa kamatayon ni Kean Gabriel Agustin, kwatro-anyos nga gisulod og sako sa iyang mga ginikanan hangtud namatay niadtong Agosto 30, 2016.

Human sa hitabo, natukod ang Kean Gabriel Hotline ubos sa CSSDO diin nagserbisyo kini 24-oras kinsa nagadawat og mga sumbong sa pangabuso sa mga kabataan.

Apan gikasubo sa mga silingan sa tres-anyos nga ulahing biktima, ug ilang namahay ang ilang kaugalingon human wala gayod dayon sila kasumbong sa awtoridad sa gihimo sa palahubog nga amahan. (Jeepy P. Compio)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph