SI Senador Grace Poe mao na ang nag-una sa survey nga gihimo sa Pulse Asia gikan sa Mayo 30 hangtod sa Hunyo 5 sa posibleng mokandidato sa pagkapresidente sa 2016. Na-obertikan na niya si Bise Presidente Vice President Jejomar Binay nga maoy pirming nag-una sa unang mga survey.

Si Senador Poe gipili sa 30 porsento sa 1, 200 ka mga respondents sa tibuok nasud samtang 22 porsento ang nipili kang Binay. Mao kini ang labing unang higayon nga nigawas nga numero uno si Senador Poe sa presidential survey, bisan pa kon wa pa siya moanunsiyon nga modagan siya sa pagkapresidente sa 2016.

Dako kaayo ang pagsaka sa iyangt ratings gikan sa 14 porsento sa Marso ning tuiga, samtang ang kang Binay nga rating nahagbong og pito ka porsento.

***

Unsa man kaha ang hinungdan sa pagsaka sa rating ni Senador Grace Poe? Nindut na ba gyud kaha ang mga atake batok kang Bise Presidente Binay? Samtang ang mga atake sa kampo ni Binay batok ni Poe nidailos lang sama sa tubig nga matagak sa dahon sa gabi.

Kon atong mahinumdoman, ang mga alipores ni Binay niingon nga di kwalipikado si Poe nga mahimong presidente tungod kay kuwang ang iyang residency sa Pilipinas nga ubos sa Batakang Balaod kinahanglan nga napulo ka tuig.

Sa 2016, kon subayon ang iyang sertipiko de kandidatura sa 2013 sa pagkasenador nga niingon si Poe nga unom ka tuig ug unom ka buwan pa lang siya nga nagpuyo sa Pilipinas, kuwang pa siyag unom ka buwan aron kwalipikado siyang modagan sa pagkapresidente.

***

Di lang kay kana ra. Gibutyag sa kampo ni Binay nga kinit-an lang ni si Poe sa puwahaya pa kini siya. Gibilin lang sa usa ka simbahan sa Jaro, Iloilo. Apan gisagop sa magtiayon nga Fernando Poe Jr. ug Susan Roces. Ayaw lagi ninyo daug-daoga ang mga anak sa gawas. Dihay anak sa gawas nga nihilak kay gisungog sa iyang mga kaduwa nga kuno anak sa liki sa kawayan kay way amahan. Nisumbong sa inahan nga niingon, “Ayaw paghilak kay di ka anak sa liki sa kawayan. Anak ka sa akong dakong liki.”

Tungod niini, di matino kon unsa ang citizenship ni Senador grace Poe. Filipino citizen ba ni siya o di? Si Senador Poe mismo niingon nga hangtod karon nangita pa siya sa iyang biological parents.

Pero daghang mga huhungihong nga anak siya ni kanhi Presidente Ferdinand Marcos ug sa igsuon ni Susan Roces. Di kini matino kay di man siya mosugot nga ipa-DNA test.

Delikado sab kon mahibaw-an nga anak siya sa kanhi diktador. Kadtong mga biktima sa diktadoriya di mobotar niya. Pero ang Ilocos nga gitawag nga solid north solido nga magpaluyo kaniya.