DINHI ra nato maklaro kon unsang klaseng batasan aduna kining tawo nga naglingkod karon diha sa City Hall. Mangginukdanon. Kining iyang lakang karon nga pagkuwestiyon ug pagkiha niining mga dagkong negosyante nga nakapalit og luna diha sa South Road Properties (SRP) nga matod pa nakahimo og kalapasan sa pagtukod sa ilang edipisyo ug pagpanikas sa pagbayad og buhis, klaro ug tataw nga pagpanggukod.
Niadtong miaging semana, gikiha niining “kanhi laos nga pulitiko” ang SM Prime Holdings nga maoy tag-iya sa SM Seaside Mall diha sa SRP gumikan kay wala modeklarar sa insaktong gidak-on sa ilang basement, pavement ug roof deck. Gumikan niini ang assessment sa ilang bayranan nga buhis, ubos usab kay gi-underdeclared man. Inay nga mobayad ang maong kompaniya og P37 milyones arong tuiga, P14 milyones ra ang gibayad. Klaro kuno kaayong pagpanikas. Dako ang kolektahonon sa City Hall sa maong kompaniya kon apilon ang ilang tinud-anay nga bayranan sa miaging mga katuigan. Hinungdan nga iyang gikiha og pagpangluko o pagpanglimbong base sa Article 318 sa Revised Penal Code. Kining iyang gihimo, matod pa niya, magsilbing warning niadtong mga kompaniya nga nakahimo og susamang kalapasan.
Lain niyang gigukod mao ang pagtukod sa Il Corso building diha gihapon sa SRP ng gipanag-iya sa Filinvest Inc. Ang SM, Filinvest ug Ayala land Inc., maoy namalit og luna diha sa SRP atol sa administrasyon ni kanhi mayor Mike Rama. Ang maong deal kusganong gisupak aning maong kanhi laos nga pulitiko kay wala siya makauyon sa deal nga gipaagi og public bidding kay ang iyang gusto mao man ang unsolicited proposal. Ug dili niya gusto nga pahilabtan ang SRP ni Rama.
Apan bisan pa man sa iyang kusganong pagsupak, natigayon ang maong deal sa City Hall ug sa tulo ka mga dagkong kompaniya diin nakakuwarta ang city government og P16 bilyones diin P8 bilyones ang pasiunang bayad nadawat na sa kagamhanan. Mao kini ang hinungdan kon nganong nasuko kining maong kanhi laos nga pulitiko sa maong tulo ka mga kompaniya. Pun-an pa nga niadtong eleksiyon wala kaayo siya hatagi og dakong campaign funds, aw, samot.
Mao nang dili kita angayang matingala nganong iyang panggukdon kanang mga negosyo sa maong mga kompaniya diha sa SRP. Ang nga tenants o kanang mga establisamento nga nag-abang diha sa SM Seaside ug Filinvest dili niya pa-isyuhan og occupancy ug mga business permits. Unya unsa man ang mahitabo? Aw, dili makanegosyo. Kining iyang gihimo nga pagpanggukod dili makaayo sa ekonomiya dinhi sa dakyanan. Personal ug pulitika gihapon ang motibo. Puwera gaba ana niya. (bobby@sunstar.com.ph)