UNSA gyud kahay naa sa utok aning laos nang pulitiko no nga nagsige naman lang niya siyag pagpanggukod sa mga department head diha sa City Hall ubos sa administrasyon ni Mayor Mike Rama. Gumikan ba kaha kini nga wala na siyay gihimo karon ug iya nalang bantayan ang mga kalihukan diha sa City Hall ug mangita lang og sayop. Mao ni giingon sa iningles nga “an idle mind is the devil’s playground.” Sa ato pa, “ang utok o huna-huna nga walay lingaw maoy duwa-anan sa demonyo.”

Kay bisan unsa na man lang ang imong huna-hunaon basta way lingaw ang imong utok. Mao nga demonyo na lang ang maghari. Una, gikiha ning maong laos nga pulitiko sila si Mayor Rama, Vice Mayor Edgardo Labella ug pipila ka mga konsihal gumikan sa pagpagawas sa calamity assistance alang sa mga opis­yal ug empliyado sa City Hall. Apan gusto niyang i-libre ang iyang mga kaalyado sa konsiho.

Dayon, iyang gipasakaan og kutay nga kasong administratiba si City Treasurer Diwa Cuevas sa Department of Finance ug sa Civil Service Commission pinasikad sa adverse findings sa Commission on Audit. Hangtod ako napagan nalang hinoon sa dihang akong gidepensahan si Cuevas. Gikiha kog libel ning maong tawo. Dayon iyang gipuntariya na usab si City Legal Officer Jerone Castillo kay matod pa dili kwa­lipikado kay dili lomulopyo ning dakbayan ug dili usab botante.

Karong bag-o, iya na usab nga gikiha si Probe Chief Raquel Arce gumikan sa dili makiangayon nga demolisyon sa mga lumolupyo sa F. Ramos extention. Kay lagi kuno nangabusar ug naka-komiter og inhustisya ang grupo ni Arce. Pastilan no, kinsa na usab kaha ang sunod niyang ikiha diha sa City Hall?

Motibo

Unsa gyud kaha ang motibo ning maong laos nga pulitiko? Pagpanggukod, pulitika o publisidad? Mo­rag wala koy laing mahuna-hunaan kon dili mao lang gyud ning tulo ka mga motibo. Iyang gipanggukod kining maong mga department head pinasikad sa mga walay basihanan nga mga akusasyon aron lang dauton ang administrasyon ni Mayor Rama. Pulitika gumikan kay gusto man gyud nga mobalik ning maong tawo sa City Hall gumikan sa mga personal ug pulitikanhong interes. Kay masakiton naman unta ni siya, angay lang unta na kini siyang mopahuway. Ug katapusan, mao ang publisidad. Kay gusto man siyang molansar sa sunod tuig nga eleksiyon, mao nga nagkinahanglan siya og publisidad aron dili makalimtan sa mga botante. Pero dili na siguro kitang angay pang magpalingla ning maong tawo. Nahibalo na mo sa batasan niini nga wala sa iyang bukabolaryo ang termino nga “mapahi-ubsanon.”

(bobby.nalzaro@yahoo.com)