GIPANEGURO ni Davao City Mayor Sara Duterte-Carpio nga di gayud maibanan ang badget sa pobre sa Lingap Para sa Mahirap.
"Gi-explain ko naman na nga those individuals violating laws nga naaksidente sila, pagkahuman mo-claim sila og benefits sa gobyerno," ingon sa Mayor sa pakighinabi sa mga tigbalita didto sa RDR Gym sa Tagum City kagahapon.
Gipaneguro sab sa Mayor nga imbestigahan pag-ayo sa kapulisan ang mga samad sa mga tawo nga napusilan sa bukid, aron masuta kung miyembro ba kini sa NPA.
"Mogawas ma na sa medical report, kung gunshot wound imbestigahan dayon kung unsay gigikanan sa gunshot wound," pung sa Mayor sa pagsuta kung NPA ba ang nasamdan.
Gitin-aw sab sa Mayor nga di gayud makahimulos ang mga NPA sa Lingap sa Davao City nga maoy rason sa paglagda niini sa Executive Order (EO) No. 7 series of 2018 niadtong Marso 14, 2018.
Nakalatid sa maong EO ang pag-amenda sa Executive Order No. 35, series of 2016 sa mga basehan aron makahimulos sa programa sa dakbayan.
Di sab makahimulos ang mga motorista nga biktima sa disgrasya kini bunga sa wa niini pagtuman sa balaod sa dakbayan ingon man ang mga inahan nga nagpakuha sa ilang gisabak.
Ang Lingap Para sa Mahirap Program gimugna nga programa aron makatabang sa mga naglisod nga Dabawenyo sa hisgutanang medikal ug pagpalubong sa namatay. (JPC)