MAAYO unta nga kung dunay kaguliyang sa Cagayan de Oro Water District (COWD), dili na unta malakip sa perwisyo ang katawhan.
Ug labihang maayo nga samtang gapadayon ang mga isyu sud sa pagdumala ug pagpanerbisyo sa mga konsumante, maayo tingali nga ma libre ang katawhan sa pagbayad sa metrohan, ug sa sweldo sa mga opisyales sa COWD panguhaon ang mga bayronon sa operasyon hangtud sa maplastar na nila og balik ang mga problema.
Intawon, mao na lang tana ilang ikabalik sa katawhan isip consuelo sa mga palya nila sa serbisyo.
Duna na gani'y problema daan sa pag mintenar sa supply sa tubig, duna pay politika nasagol sud sa mga opisyales sa COWD.
Ug kung dunay bag-ong contractor sa bulk water supply, makatabang kaha kini sa katawhan?
Pipila lang kini sa mga managlahing isyu nga angay sulbaron sa mga nagdumala sa COWD.
Ang naka-apan lang niini nga samtang gasige sila'g bangi, halos mabiyaan na ang de kalidad na pagpanerbisyo sa katawhan, wala pa'y labot ang hisgutanan kung kanus-a ma upgrade nlang ubang mga pasilidad aron bisan inig panahon sa dagkong baha, dili maapektuhan ang supply sa tubig sa ubang mga dapit sa dakbayan.
Sa tinuod lang, sa gipakita sa mga tigdumala ug opisyales sa COWD kabahin aning mga politikanhong panagbangi, daw gahatag kini og timailhan nga wala gyud nahan-ay ang COWD sukad pas una. Pasabot, kung duna ma'y kabag-ohan, kumingking ra ang naabtan.
(Nefluczon@gmail.com)