ALANG ni second district councilor Al Ryan Alejandre nga dakong tabang ang feedback sa resulta sa Ironman dinhi sa Davao tungod sumbanan nila kini sa mosunod nga mga events nga himuon sa dakbayan.
"Mahimo nato ng way how to address different issues sa sunod nga, nga ma-improve ang pag-handle sa event," matud niya.
Sa pikas bahin, pipila sab ka sakyanan ang na-towing human naka-atang kini sa dalan asa mo-agi ang mga partisipante sa kompetisyon.
"Naay mga na-towing nga sakyanan, pero dili pa lang nato masulti pila ang number niini," ni Davao City Transportation and Traffic Management Office (CTTMO) head Dionisio Abude.
Dugang niya nga nalikayan sab ang build up sa mga sakyanan tungod sa koordinasyon sa mga personahe nila.
"So far wala tay reported build up kay kung naa man ma-divert man dayon nato sila sa alternate roads," dugang sa opisyal.
Ni Abude nga may natala lang silang balda sa dalan kadtong mga nagubang bisekleta sa duha ka partisipante.
Gihulagway sab ni DCPO city director Police Senior Superintendent Alexander Tagum nga ang crowd sa Davao “mas manageable.”
Niya, kung may mga kakulian man, ginagmay lamang kini ug parte gyud sa unsa mang kalihukan.
"Naa may mga problema pero masolusyonan man sab dayon sa atong kapulisan, parte lang gyud na sa bisan unsang activity nga mahitabo."
Luyo sa mga pros ug iladong magduduwa sa triathlon nga langyaw ug Pinoy, excited sab ang crowd nga nag-atang sa pipila ka celebrities nga miapil sa indigay.
Anaa sila Mateo Guidicelli, Georgia Guidicelli, Gretchen Fullido, Dianne Castillejo ug Kim Atienza.
Mas espesyal sab ang pagdagan ni Alvin Suemitsu tungod pag-abot niya sa finish line, miluhod kini ug nagpropose og kasal sa karelasyong si Freah Ramos.
Sa Facebook post ni Suemitsu ang iyang pag-apil sa Ironman gihalad niya sa iyang inahan ug umaabot nga kapikas sa kinabuhi.