FREDRICK F. GELBOLINGO
121 Prenza, Argao, Cebu
AH, humota, ah!” matod ni Miguel paghimuntog niya sa nataran sa balay sa iyang pag-umangkon nga si Berto. Naabtan niya kini nga nag-ukay-ukay sa giluto nga karne nga diha sa kawa ginamit ang luwag nga bagol nga kawayan ang kaptanan. Ang kawa gapatong sa sug-ang nga tulo ka dagkong bato.
Nahingos ni Miguel ang kahumot sa alimyon sa giluto nga putahe. Nahigop niya ang mitulo niyang laway tungod sa kalami tan-awon sa karne nga diha sa nagbukal nga manteka sa kawa. Ang sugnod mga bukong ug palwa nga kusog kaayo ang siga.
“O, Tiyo, maayo kay nia ka. Ayg lakaw ha. Mangaon ta ron dungan sa akong mga barkada,” ni Berto nga mitan-aw sa iyang mga barkada nga nalingaw sa giinom nilang tuba.
“Molakaw gyud dayon ko, Dong,” ni Miguel bisan padayon nga mitulon sa iyang laway.
“Aysa lagi, Tiyo, kay mangaon na ta. Maghukad na ko,” ni Berto nga nagbitbit nag bandehado.
Nahitalunong si Miguel. Wa diay magdumot niya ang iyang pag-umangkon nga si Berto, bisag giayo niyag lusi ang dunggan niini kaniadto. Usahay kumoton niya ang buhok, kusion ang panit ug sukmagon ug patiran dihang bata pa kini. Gibiin sa iyang igsuon si Berto kaniya kay nag-domestic helper sa Hongkong. Maayo gihapon kini motagad kaniya bisag gikan na kini sa gawas sa nasod kay nakatrabaho sa usa ka ‘cargo ship’ nga ang biyahe Israel ug Egypt.
“Molakaw na ko, Dong,” ni Miguel kay tua pa man sa unahan ang iyang pinuy-anan. Gikan siya nangita sa iyang iro nga wala pa mahiuli sa ila.
“Maniudto sa lagi ta, Tiyo. Ibutang ko na ni sa lamesa, kining akong gisukad,” matod ni Berto.
“Molakaw na ko padung diha sa lamesa, Dong, ba! Kay lami na kaayo ikaonm da,” ni Miguel nga pina-scrub pa ang iyang mga kamot. Nag-hinamhinam na siya.
“Aw, O,” tubag ni Berto.
Milingkod dayon si Miguel sa bangko sa lamesa nga diha sa nataran gipahimutang.
“Ah! Lamia sa giluto nimong adubong baboy ug pig steak, Dong, uy! Busog kaayo ko,” ni Miguel humag tungab sa usa ka basong tuba.
“Karnero to, Tiyo, uy! Di to baboy,” ni Berto nga nagngisi.
Mingisi pod ang kanhi niyang mga barkada nga sila si Fred, Arsok. Pilo, Ric, Gel. Boy, nga maingon nga puro na maayog mga trabaho. Nagkupot sila tagsa-tagsa og baso nga may sulod nga tuba.
“Bantog ra, lami kaayo. Gikan to sa Israel karneroha, Dong, o sa Egypt?” ni Miguel nga gahapuhap sa iyang tiyan.
“Diri ra man to nako hikit-i, Tiyo,” ni Berto
“Duna diay karnero diri?” ni Miguel nga nahibulong.
“Karnero. Minubo na, Tiyo, sa kane sa iro.” ni Berto,
Mibahakhak ang mga amigo ug barkada ni Berto. Puwerteng sukaa ni Miguel.
“Joke-Joke lang, Tiyo, uy! Imo sab bitaw kong gikomedyahan sa una,” ni Berto nga nagkatawa gihapon.
(KATAPUSAN)