POSIBLENG isibog ang ipahigayon nga Matina Enclavex Mini Basketball Tournament inay himuon ugmang adlawa.

Kini ang pahayag ni Neil Baquiran, organizer sa maong torneyo atol sa Davao Sportswriter Association (DSA) Forum didto sa SM Davao Annex, dalang Quimpo Blvd. ug giisponsoran sab sa Belgian Waffle kagahapong adlawa.

"Currently, ginafinalize pa, basin ma-sked ni later in August because of availability sa Almendras Gym," ni Baquiran.

Ang kompetisyon dunay high school dibisyon- 17 anyos pataas ug grade school dibisyon - 8 anyos pataas nga gilangkuban sa Ateneo de Davao University (AdDU), Holy Child College of Davao, University of Immaculate Concepcion, Preciouse Intenational School of Davao, Agro Industrial School, Philippine Women's College ug Assumption College of Davao.

Samtang ginahulat pa ang kompirmasyon sa Davao Christian School ug Stella Maris Academy of Davao.

Mga partisipanteng eskuwelahan magkontra sa single round robin format diin ang duha ka tim nga manguna maoy mag-atbang sa kampeyonato.

Sumala pa ni Baquiran nga tumong niini mao ang pagpangita og "key players" nga puwede imugna og tim nga pulos star player alang unta sa umaabot nga Kadayawan.

"Supposedly, mag-select ng key players for Kadayawan, na-change man but ipadayon gihapon namo kini," matud ni Neil.

Dugang niya, premyong kuwarta, medalya ug tropeyo ang ihatag sa tim nga mokampeyon sa torneyo nga gitugotan sa Samahan Basketbol ng Pilipinas ubos ni Regional Director Regino Boy Cua.