ANG Columbia FC ug SOS-Sakya FC maoy mibulsa sa titulo sa ilang tagsa-tagsa ka dibisyon sa bag-ohay nahuman nga Davao Football Association (DFA) Independence Day Football Festival didto sa Tionko field.

Ang Columbia FC maoy mikampeyon sa men's open human wa gipaiskor ang Philippine College of Technology (PCT)-Medvil FC, 2-0, sa finals samtang ikatulo ang Dadiangas FC human gipalukapa ang Hooligans FC, 5-4, pinaagi sa penalty shootout.

Sa bahin sa babaye, ang SOS-Sakya FC maoy nakasungkit sa titulo dihang gipildi, 1-0, ang Aguilas Dabaw FC. Punta del Sol FC midaug ug nakuha ang ikatulong puwesto batok Tambayan FC, 2-0.

Ang certificates gitunol nila DFA general secretary Erwin Protacio ug Emil Yaranon sa Motortrade.

Ang torneyo gisuportahan sa PCT, Medvil Farms Inc. Hyenas FC, GHT Water Refilling Station, Virginia Hotdog, Motortrade ug Bureau of Fire Protection.