SAMTANG dunay ni-bash sa video sa Ayala Cinemas nga nag-awhag sa mga naa sulod sa sinehan sa di pag-panic sa panahon sa mga kakuyaw ug emergency, sa akong hunahuna nakatabang tingali to sa dihang nahugno ang kisame sa Cinema 5.
Daghan ang niingon nga gipalabi lang sa mga tawo ang pagkuhag video ug wa lang maghunahuna sa ilang kahimtang.
Di lang ko moapil pagsaway. Wa baya ko didto. Ug maayo ra pod. Salamat, Ginoo!
***
Gusto gyud unta namong taga E-Group nga kulitogon gyud kon unsay tinuod tali ni Enrique Gil ug Liza Soberano: kon uyab na ba. Pareson ra ba kaayo ang mga kyampaw! Pero parehas sa uban, molimod man gyud uy!
Pero wa lang sila kabantay nga sa tanto namong pupangutana, nipagawas silag mga pamahayag nga nikontra sa ilang unang gipanulti. Di man tinuod deretso pero adto ra gihapon paingon.
“Uyab na lagi na sila,” dunay kauban sa buhat nga niingon. Pasagdai na sila uy, maoy akong tubag.
Moangkon ra na sila kon magkabulag na. Aw! Ingon ana baya nang mga taga syobis. Mao bitaw nga di ko magsunod sa mga lovelife ana nila. Kapoy!
Bitaw, in fairness, minor pa man god si Liza. Disesyete anyos pa. Gidid-an pa sa mga ginikanan.
Iya ra kunong sugton si Ken kon ma-dise-otso na siya. Bang! Dakoa sa ngisi ni Enrique uy! Maayo pa ra ba gyud mag-Binisaya.
Dinhi ang duha sa Cebu adtong Biyernes kay nipagarpar sa ilang pelikulang “Just The Way You Are” nga gisalida na sugod adtong Miyerkules.
Human ani, ang The Breakup Playlist na pod nila ni Piolo Pascual ug Sarah Geronimo ang mosunod, Ms. Josie? Atong atangan!
***
Naa diay batan-ong Cebuano nga nakasulod sa listahan sa mga housemates ni Kuya alang sa Pinoy Big Brother 737 nga magsugod na ugma. Siya si Ryan James Bacalla.
Taga diin kaha ning bataa? May panagway ug morag determinado ra ba! Hinaut nga magmalampuson siya sa pagkab-ot sa iyang damgo.
Dakog kaayog ikatabang ang suporta sa mga taga Cebu. Napamatud-an na kini sa mga bangga sa telebisyon diin gamit kaayo ang text votes.
Pila na ba ka mga Cebuano nga nakatungtong sa finals (nidaug gyud gani ang uban) tungod sa suporta sa mga Cebuano? Naa sila si Kim Chiu, Paul Jake Castillo, Slater Young ug uban pa.
***
Bilib kong Kris Aquino sa iyang pag-angkon nga iyang ‘gipahilabtan’ sa doktor ang iyang ilong aron kuno di molisngag kon maghilak siya sa mga esena sa pelikula o telebisyon. Di na tingali ta maglibog kon naghilak ba siya o nagkatawa sa esena.
Aw! Unsa ba? Hehe. Morag si direk Chito Roño man tingali to ang nisugyot nga iya kining buhaton. Gitusokan ra kuno pero wa gyud hiwaa.
Kadaghan na sa mga artista (hasta di artista) nga mga ‘Salamat po, doktor’ beauties pero, bisan pag klaro pa sa adlaw sa udtong tutok ang ebidensya, di gyud moangkon. Weeey!
Niining tungora, mosaludo ko ni Kris!
***
Ning panahon sa mga ‘gamhanan’ nga mga gadgets ug ubang kahimanan, kinahanglan na gyud nga mag-amping ta sa atong mga lihok.
Kana kon di ta gustong makita ug mahibaw-an sa madlang pipol, di lang sa atong kaugalingong lugar kon di hasta sa ubang dapit sa kalibutan, ang atong mga tinagu-an.
Parehas ni LeBron James nga nagpatuyang lag ukab sa iyang gisul-ob ug nataymingan nga mi-zoom in ang television camera diha gyud sa iyang atubangan ug… bang!