TINUN-AN sa kursong Bachelor of Science Information Technology (BS Info Tech) sa usa ka unibersidad sa dakbayan sa Mandaue gidakop sa Lapu-Lapu City Police Station II atol sa buy-bust operation.
Samtang lain usab ang dinakpan sa Police Station 3 sa ilang gilusad nga buy-bust operation sud sa motel sa barangay Pajo, Lapu-Lapu.
Ang 22 anyos nga college student nga si Braiel Augusto Absin, alyas Bolong, taga Sityo Segunda, Barangay Mactan, Lapu-Lapu City nadakpan niadtong Martes sa hapon.
Si Absin gipalitan og usa ka nilikit sa pinaugang marijuana sa kantidad nga P100 ug laing tulo ka girolyo nga mga papel nga adunay mga dahon sa marijuana ang nakuha sa iyang posisyon.
Ang maong mga ebidensiya gipadala sa PDEA laboratory alang sa chemical analysis.
Sa laing bahin, usa ka Shaun Diaz Antigua, 39, taga Barangay Banka, niabang og lawak sa usa ka motel sa Sityo Sangi, Barangay Pajo diin namaligya og shabu.
Gipaagi lang sa text messaging ang transaction ni Antigua sa iyang mga buyer.
Wa siya masayod nga pulis diay ang iyang gikasabot niadtong Lunes Santo.
Si Antigua nga gihulagway ni Chief PCI Junnel Caadlawon nga “newly indentified drug personality” ang nakuhaan og usa ka gamay nga pakete nga iyang gitunol sa poseur buyer ug laing medium size pack nga adunay sud nga gituohang shabu. (FVQ)