MOABOT ngadto sa 500 ka mga senior high school graduate ang gikatakdang patrabahuon karong summer sa Cebu City Hall ubos sa Special Program for the Employment of Students (SPES).
Si Jess Anthony dela Cruz, head sa Commission on Youth, niingon nga kadtong makapasar sa interview karong Abril 2 makatrabaho ug adunay honorarium nga P477 matag adlaw sulod sa 20 ka adlaw.
Sa higayon nga mosugod na sila og trabaho, ang uban kanila idestino sa mga buhatan ubos sa Office of the Mayor (lainlaing department) ug ang uban adto sa field aron sa pagpahigayon og imbentaryo ug pag-audit sa kasamtangang mga programa sa City Government.
Ila usab tan-awon kon unsa pay gikinahanglan aron ang maong matang sa serbisyo o programa makahatag pa og dugang benepisyo sa katawhan.
Ang Department of Manpower Development and Placement (DMDP) ubos sa liderato ni Fidel Magno, nagdumala sa maong programa, nagkanayon nga kinahanglan magdala ang mga aplikante sa ilang mga rekisito.
Kini sama sa ilang resume’, birth certificate gikan sa Philippine Statistics Authority, bag-ong grado sa eskwelahan, SRS form.
Mga aplikante kinahanglan nga mag-edad og 18 ngadto sa 30 anyos, way hagbong nga grado, ang income sa pamilya di molapas sa P131,000 matag tuig ug lumolupyo sa Cebu City. (PAC)