Dear Papa Joe,

Tawga ko sa ngalan nga Ronnel, 19 years old, nagdako sa Mindanao ug karon naa na diri sa Sugbo nanimuyo kay namalhin na man mi sa akong mama ug mga igsuon sukad namatay si papa niadtong 2011.

Mingaw ang pagbalhin namo diri ug wala dayon ko kakaplag og mga amigo kay lahi ra man ang mga batan-on diri itandi sa amo. Ang akong mga igsuon di sad nako sila masuod kaayo kay mga maguwang sila nako ug naay mga trabaho. Sila ang nibarug sa gibiyaan ni Papa. Wala sad koy nahimong friends sa school gawas lang sa usa ka babaye nga nahimo kong hinigugma. Tagoa lang siya sa ngalan nga Irene. Dali rami nagkasuod kay medyo bugoyon iyang dating pero deep inside dili. Mao to nga gipailaila nako siya sa akong mama ug okay ra man sad pagkita nila. Pero pag-uli pa nako sa balay, giingnan dayon ko sa akong mama nga palikayan ang babaye kay wala siya makauyon. Mao ni karon ang akong problema kay nahigugma baya mi sa usag usa. Siya pa ang nag-inusarang tawo diri nga matawag nakong suod. Unsa may buhaton ko?

RONNEL

Ronnel,

Ayaw una paapekto anang problema nimo. Atimana una pag-ayo ang imong pagtuon. Sayon isulti namo pero mao nay maayo kay basin ang punto ni Mama nimo nga basin kon di na ka magtarong o maapektuhan ang imong pagtuon kay nisulod ka og relasyon. Basin ang nakita ni Mama nimo nga basin masakitan lang ka kay bugoyon baya og nawong imong uyab o ba kaha maikog si Mama nimo sa imong mga maguwang kay maoy nigasto nimo.

Ang maayo focus ka sa imong pagtuon. Di sab kinahanglan nga magbuwag mo. I-prove ni mama nimo nga pwede siyang mahimo nga inspirasyon para makab-ot nimo ang imong pangandoy. Usa pa, first time pa sila nagkita, Sa akong kasinatian, ingon ana gyud na ang mga mama kay mobatyag na sila og selos. Kana lang ug daghang salamat.

PAPA JOE

(sa inyong tampo ipadala lang sa papajoesuperb@gmail.com)