ASA naman ang hustisya sa kamatayon sa liboan ka mga tawo nga napatay sa riding in tandem ug kampanya sa kapulisan batok sa ilegal nga drugas?
Kining maong pangutana mitumaw sa nagpadayong pinatyanay nga nahitabo sa nasud ug nahimong inutil ang kapulisan sa pagsulbad.
Karong bag-o, dugang pulitiko ang napatay sa riding in tandem nga si Konsehal Paolo Edison Dela Rita, Sr. sa Guihulngan City Negros Oriental.
Ang kaso sa pinatyanay nakapa alarma na kini sa katawhan sa nasud , simbahan, ug sa tibuok kalibotan.
Ang pagbasol giduot ngadto ni Presidente Rodrigo Duterte, tungod sa pagpasiugda sa kampanya batok sa ilegal nga drugas nga miresulta sa ilang gitawag nga extra judicial killing.
Tungod niini, nag-ung-ong ang kaso batok sa presidente sa International Criminal Court (ICC) nga miresulta sa pagbiya sa Pilipinas isip sakop.
Kon imong sabton ang paghatag og dakong sohulan pinaagi sa pagdobli sa kapulisan di epektibo aron sab doblihon ang ilang trabaho.
Sa ato pa napakyas ang kapulisan sa pagtuman sa ilang trabaho di lang pagsulbad sa mga kaso sa pagpatay hilabi na sa pagpalipod sa kinabuhi sa katawhan.
Mao nga magpaabot kita nga dunay laing pulitiko ang matumba human napatay si Konsehal Dela Rita, Sr.
Pero mas grabi ang pagpatay sa mga yanong tawo nga daw sama lang ug mananap. Igo nalang tawon sa paghilak ang pamilya niini. Ang kuwartahan makatanyag man og reward money.
Aguirre vs. Osmeña
Dili lang si Cebu City Mayor Tomas Osmeña, ang nagkuwestyon sa kredibilidad ni Justice Secretary Vitaliano Aguirre.
Gikuniskunis sa pagsaway si Aguirre sa hukom sa Depatment of Justice (DOJ) sa pag-absuwelto sa kasong giatubang sa illegal nga drugas nila ni Peter Lim, Kerwin Espinosa, Peter Co ug mga kaubanan.
Tungod sa kauwaw ni Aguirre sobling giablihan ang kaso. Pinaagi sa pagmando sa sobling pag-atubang sa mga akusado.
Kon anaa sa punto si Aguirre sa kaso ni Osmeña nga drug protector tungod sa testigos nga maoy naghatag sa mayor og P7 milyones.
Si Kerwin miangkon nga drug lord. Si Peter Lim, ang presidente mismo ang mitabi nga sakop sa Triad, usa ka sindikato sa ilegal nga drugas nga naglihok sa Asia.
Kon naguba ni Aquirre ang pangan ni Osmeña, pareho ra ba kaha sila si Aguirre ug Duterte?
(Email: efren_lonzon@yahoo.com Text: 09235562777)