KON aprobahan sa Department of Foreign Affairs (DFA) ang hangyo ni Cebu City Mayor Tomas Osmeña nga mopahigayon ang ahensiya og “Passport on Wheels” sa dakbayan, makapahimulos ang mga Sugbuanon sa mga gusto pa mokuha og passport nga naglisod sa online appointment.
Kini kay magpalista raman sa local government unit (LGU) aron mahatagan og kahigayonan nga makaproseso sa ilang paglukat og passport.
Si Osmeña nipadala og suwat ngadto kang DFA assistant secretary Frank Cimafranca niadtong Marso 27 aron mohangyo nga himuon usab ang maong programa sa dakbayan sa Sugbo.
Gipaagi sa mayor ang hangyo ngadto kang DFA 7 Regional Director Emmanuel Espineli.
“We would therefore like to request your good office to schedule a visit of the Passport on Wheels in Cebu City,” tipik sa suwat ni Osmeña.
Ang Passport on Wheels usa ka programa sa DFA diin magpalista ra kadtong gusto molukat o magpaproseso sa ilang passport unya himuon kini sa usa ka dapit nga dali ra nga mabisita sa konstituwente sa LGU nga nihangyo niini.
Tungod kay gipatuman man sa DFA ang online appointment, wala nay walk-in nga applicants sa ilang buhatan apan dali ra usab kini mahurot ang gigahin nga slots sa matag adlaw.
Gisuwayan pagtawag sa Superbalita Cebu ang buhatan sa DFA 7 apan pakyas. (HBL)