PIPILA ka buwan human gipakanaug ang hukom nga nagbasura unta sa kaso batok sa gidudahang mga drug lord, ang kapulisan way kasayuran nga ang usa sa ilang gikiha hagbay rang namatay.
Ang namatay usa sa gilakip sa pagkiha sa gidudahang drug lords nga sila si Kerwin Espinosa ug Peter Lim.
Ang Albuera, Leyte police, pinaagi sa usa ka certification, nipahibawo sa Department of Justice (DOJ) panel of prosecutors nga naghupot sa kasong illegal drugs batok sa Visayas-based suspected drug lords, nga si Nelson “Jun” Pepito gipatay sa wa mailhing mga mamumuno niadtong Disyembre 1 sa sityo Canlugo, Barangay Seguinon, Albuera, Leyte.
Ang certification giduso human ang DOJ panel of prosecutors niisyu og subpoena nga nagmando kanila ni Espinosa, Lim ug Pepito sa pagtambong sa preliminary investigation sa kaso karong Abril 12.
Ang dokumento, nga gipirmahan nila Albuera Police Chief Ronald Espina, nagkanayon nga si Pepito namatay human makaangkon og daghang mga samad pinusilan sa nagkadaiyang bahin sa lawas.
Niadtong Marso 10, laing respondent sa kaso, Max Miro, nailhan nga bata-bata ni Espinosa, napatay human giingong nisukol dihang dakpon unta sa Ormoc City, Leyte pinasikad sa usa ka warrant of arrest.
Ang kasong illegal drugs batok kanila ni Lim, Espinosa, Pepito, Miro ug kaubanan tungod sa giingong panagkunsabo sa pagpamaligyag illegal drugs gibasura sa DOJ base sa resolusyon nga gipetsahan og Disyembre 20, 2017.
Apan ang hukom gibaliktad ni Justice Secretary Vitaliano Aguirre II human sa grabeng mga pagsaway sa publiko.
Bisan si Presidente Rodrigo Duterte nasuko og maayo human masayri ang hukom sa unang panel of prosecutors nga naghupot sa kaso. (Sunnex)