SUPERBALITA CEBU

Barrita: Napoles ug ang witness protection program

GIBUTYAG ni Justice Secretary Vitaliano Aguirre II nga kasamtangang ibutang si Janet Lim-Napoles, ang gitumbok nga utok sa P10 bilyunes nga pork barrel scam nga naglambigit sa daghang mga magbabalaod, ubos sa witness protection program (WPP) sa kagamhanan tulo ka semana gikan karon.

Ang tumong niini mao nga patestiguhon si Napoles sa nagpadayon nga imbestigasyon sa Department of Justice (DOJ) sa Priority Development Assistance Fund (PDAF) program atol sa administrasyon ni Presidente Benigno Aquino III nga gideklarar sa Korte Suprema nga unconstitutional niadtong Nobyembre 2013.

Apan nabaraw ang pagbutang kang Napoles ubos sa kustodiya sa DOJ tungod sa gipagawas nga full-court resolution sa Korte Suprema, penetsahan og Pebrero 6, nga di kahatagan si Napoles og provisional freedom kon kasamtangang kagawasan tungod sa “great presumption of guilt” sa iyang kalambigitan sa P10-billion pork barrel scam.

Si Napoles nabilanggo og duha ka tuig sa Correctional Institution for Women sa Mandaluyong City human konbiktoha sa usa ka korte sa Makati City sa kasong serious illegal detention nga gipasaka sa iyang ig-agaw, si Benhur Luy, ang numero unong whistleblower sa pork barrel scam.

Gibalik si Napoles sa Camp Bagong Diwa sa Taguig City human mo-interbenir sa maong kaso si Solicitor General Jose Calida niadtong Mayo sa miaging tuig mao nga nabali ang iyang pagkakonbikto ug naabsuwelto siya sa maong kaso.

Ang unom ka pahina nga en banc resolution sa Korte Suprema, nga gisuwat ni Associate Justice Andres Reyes Jr. ug gidasonan sa laing napulo ka mga mahistrado, wa maghisgot sa pagbutang kang Napoles ubos sa witness protection program.

Ang gituki niini mao ang motion for reconsideration ni Napoles sa duha ka mga desisyon sa Sandiganbayan nga nagbalibad sa iyang mosyon nga makapiyansa sa makaduhang higayon ug gidasonan sa Korte Suprema niadtong Nobyembre 7, 2017.

Apan ang bag-ong desisyon usa ka dakong babag nga makaangkon og temporaryong kagawasan si Napoles pinaagi sa paghimo kaniya nga usa ka state witness. Ato unyang dugangan sa paghisgot ang maong programa sa mosunod nga mga lindog.

Matod pa sa Labawng Hukmanan, ang petition for bail ni Napoles wa maglambigit sa pagtino kon duna bay “proof beyond reasonable doubt,” pruweba nga way makatarunganong pagduda, nga si Napoles mao ang utok sa kasong plunder.

“These are matters of defense best left to the discretion of the Sandiganbayan in the resolution of the criminal case. It was sufficient that the denial of her bail application was based on evidence establishing a great presumption of guilt on the part of Napoles,” matod pa sa mga mahistrado. (edbarrita@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph